Жасур Яхшибоев: "Ҳозир ҳам таклифлар бор, лекин..."

Барчага таниш бўлган иқтидорли футболчиларимиздан бири Жасур Яхшибоев ҳозирда жамоасиз.

Маълумки, у охирги марта шу йили Эрон чемпионатида “Нассаджи Мазандаран” клубида фаолият олиб борди. Лекин ушбу жамоада узоқ қолгани йўқ.

Куни кеча Sports.uz журналисти Жасур Яхшибоевдан интервью олди.

- Охирги марта Эронда фаолият олиб бордингиз. У ердан кетганингиздан кейин сизни майдонда кўрмадик.

- Нима десам бўлади? Кўриб турибсизлар, охирги жамоам Эрон клуби эди. Ундан кейин вариантлар бўлди. Лекин кўнглимдагидек таклифлар чиқмади. Юқорига кўтарадиган жамоалардан таклифлар бўлмагани учун вақтинчалик танаффус қилиб турдим. Лекин ҳозирги пайтда яхши вариантлар кутиб турибман.

- Демак, сизни маълум вақт жамоасиз қолишингиз жароҳатингиз билан боғлиқ эмас, шундайми?

- Йўқ.

- Эроннинг “Нассаджи Мазандаран” клубидаги фаолиятингиз қандай кечганди ва у ердан кетишингиз нима сабаб бўлган?

- Эрон чемпионати яхши. Лекин мен борган жамоа лигада қолиш учун курашаётганди. Охирги 6 та ўйин қолганида у ерга бордим. Афсуски, клуб лигада қололмади. Биринчи лигасида легионерлар иштирок эта олмаслиги учун у ердан кетишга мажбур бўлдим. Аммо улар менга яна 1,5 йиллик шартнома таклиф қилишганди. Жамоа қуйи лигага тушиб кетгани учун у ердан кетишга мажбур бўлдим.  

- Бизда қишки трансфер ойнаси очилган. Табиийки, бундай маҳалда турли миш-мишлар кўпаяди. Шу нуқтаи назардан айтадиган бўлсак, сиз билан боғлиқ гап-сўзлар ҳам йўқ эмас...

- Таклиф тушса хурсанд бўламан. Кўрган бўлсангиз, ижтимоий тармоқларда мени “Андижон”га ўтяпти деб ёзишди. Буни кўриб ўзим ҳайрон бўлдим. Мен бу масалада ҳеч ким билан гаплашмаганман ва қўнғироқ ҳам бўлмаган.

- Янги мавсумда режангиз бўйича Суперлигада ўйнамоқчимисиз ёки яна легионер сифатида фаолиятингизни четда давом эттирмоқчимисиз?

- Аниқ бир нима дея олмайман. Вақт кўрсатади. Балки Суперлигада, балки яна легионер бўлиб ўйнарман. Кўрамиз!

- Яқинда жаҳон чемпионатига қуръа ташланди. Миллий терма жамоамиз жой олган гуруҳ ҳақида фикрингиз қандай?

- Ўзбекистонга иккита кучли жамоа тушди - Колумбия ва Португалия. Улар Жанубий Америка ва Европада ўз ўрнига эга. Ўйлайманки, мундиалда жуда қизиқ ўйинлар бўлади. Жаҳон чемпионатида терма жамоамизга омад тилайман.  

- Шунингдек, сиз ўз вақтида Европа Чемпионлар лигасида “Реал”га гол урган ҳолда ўзбек футболи тарихига киргансиз. Ўша голингизни кўриб турасизми?

- Бунга бир неча йил бўлди. Барибир хотирамда қоладию, лекин тарихга айланган. Келажакда яна шунақа формага кириб, яхши клубларда тўп суришга ниятим бор. Ижтимоий тармоқларда ўша видео келиб қолса кўраман.

- Янги мавсум бўйича янги клубингиз масаласида қачон бир тўхтамга келишингиз мумкин?

- Ҳозир декабрдамиз. Трансферлар ойнаси яқиндагина очилди. Балки бу ой, балки январда ҳал бўлар. Ҳозир ҳам таклифлар бор. Лекин ўзимни унчалик қониқтирмаяпти. Кутишга бироз вақт бор. Яхши вариантларни кутиб турибман.