Жамшид Искандеров: “Бунёдкор”ни ҳурмат қилган ҳолда, шуни айтишим мумкинки ...

Ўзбекистон Суперлигаси 24-туридан ўрин олган “Навбаҳор” – “Бунёдкор” жамоалари  ўртасидаги  учрашув арафасида “лочинлар”нинг 30 ёшли тажрибали ярим  ҳимоячиси Жамшид Искандеров бўлажак  ўйин ҳақидаги фикрлари билан ўртоқлашди.

- Худога шукр, “Бунёдкор”га қарши кечадиган баҳсдан олдин Осиё Чемпионлар лигаси доирасидан ўрин олган беллашувда ҳам юртимиз шарафини муносиб тарзда ҳимоя қилиб, Эрондан ғалаба билан қайтдик ва шунинг учун айни пайтда кайфиятимиз юқори. Мазкур учрашувга эса жиддий тарзда тайёргарлик кўрдик.

“Бунёдкор”ни ҳурмат қилган ҳолда, шуни айтишим мумкинки, бўлажак ўйинда майдонга ғалаба иштиёқида тушамиз. 

Мухлислардан эса биз – футболчиларни муносиб тарзда қўллаб –қувватлашларини сўрайман. Биз эса уларнинг ишончларини оқлаш, стадиондан уйларига яхши кайфиятда қайтишларини таъминлаш учун барча имкониятимизни ишга соламиз.

Фурсатдан фойдаланиб, жамоамизга барча шароитларни яратиб бераётган Наманган вилояти ҳокими Шавкатжон Шокиржанович Абдураззоқов ва “Навбаҳор” клуби вице-президенти Отабек Арифович Саматовларга ўз миннатдорчилигимни билдираман.

“Навбаҳор”нинг зафарларида уларнинг ҳам муносиб ҳиссалари бор.          

“Навбаҳор” ПФК матбуот хизмати.