Жаҳон чемпиони ўзбек боксчисига қарши жанг ўтказиши шарт қилинди

Жаҳон бокс ассоциацияси (WBA) ўз версияси бўйича иккинчи ўрта вазн тоифасидаги жаҳон чемпиони, мексикалик Хайме Мунгия (46-2, 35 КО) ўзбекистонлик Бектемир Мелиқўзиев (17-1, 11 КО) билан мажбурий ҳимоя жангини ўтказишини белгилади. 

WBA тарқатган расмий баёнотга кўра, икки томон жангни ташкил этиш шартлари бўйича 21 октябрга қадар келишиб олиши керак. Агар шу муддат ичида келишувга эришилмаса ёки тарафлардан бири музокаралардан бош тортса, ташкилот промоутерлик савдоларини эълон қилади.

Хайме Мунгия чемпионлик камарини жорий йил 2 май куни қўлга киритганди. У Хосе Армандо Ресендисни ҳакамлар якдил қарори билан мағлуб этиб, WBA чемпионига айланган. Мексикалик боксчи учун мажбурий ҳимояни ўтказиш муддати 30 август куни якунланган.

Бектемир Мелиқўзиев WBA рейтингида биринчи ўринни эгаллаб, расмий мажбурий даъвогар мақомига эга. У ўзининг сўнгги жангини шу йил февраль ойида Лас-Вегас шаҳрида ўтказган. Ўша баҳсда ўзбекистонлик боксчи еттинчи раундда америкалик Сена Агбекони нокаутга учратган эди.