Жаҳон чемпионатида қайси клуб ғолиб чиқиши айтилди

ФИФА томонидан янги форматда ташкил этилган ва АҚШ стадионлари мезбонлик қилаётган клублар ўртасидаги жаҳон чемпионатида энг кучли тўрт жамоа ярим финалга чиқди.

Opta маркази суперкомьютери махсус алгоритмлар асосида нуфузли мусобақада ғолиб чиқиш бўйича ярим финалчи жамоаларнинг имкониятларини ҳисоб-китоб қилиб чиқди.

Унга кўра, тарихий чемпионатда Европа Чемпионлар лигасининг амалдаги ғолиби – “Пари Сен-Жермен” футболчиларининг чемпионлик имконияти энг юқори – 38,54 фоизга тенг, деб баҳоланди.

Кейинги кўрсаткич, Англиянинг “Челси” клубига тегишли бўлби, 33,86 фоиз экани қайд этилди.

Юлдузларга тўлган “Реал”нинг жаҳон чемпионатида ғолиб чиқиш имкони 24,67 фоизни ташкил қилмоқда. Бразилиянинг “Флуминенсе” жамоасининг чемпион бўлишига деярли ҳеч ким ишонмаяпти – 2,93 фоиз.

Ярим финалда “Флуминенсе” англияликларга қарши саф тортади. Иккинчи ярим финалда ўзаро тўқнаш келадиган ПСЖ ва “Реал” учрашуви финалдан олдинги финал бўлади. Ярим финаллар 8 ва 9 июль кунлари, Финал эса 13 июль куни бўлиб ўтади.