Исроил Мадримов: "Кейинги жангим ҳам камар учун бўлади"
- 8-август 2024, 20:59
- Oybek Yo’ldoshev
- 0
- Бокс
Исроил Мадримов юртимизга қайтиб келди.
Хабарингиз бор, яқиндагина АҚШнинг Лос-Анжелес шаҳрида катта профессионал бокс оқшоми ташкил этилган эди. Ушбу оқшомнинг марказий жангида Исроил Мадримов АҚШлик Теренс Кроуфорд билан биринчи ўрта вазн тоифасида WBA камари учун жанг қилди.
Бугун тонгда эса боксчимиз Ўзбекистонга қайтиб келди. Мадримовни Ислом Каримов номидаги Тошкент Халқаро аеропортида расмийлар ва кенг жамоатчилик тантанали равишда кутиб олдилар. Мадримов Кроуфорд билан жанг, навбатдаги режалари ҳақида ўз фикрлари билан ўртоқлашди.
Ассалому алайкум, Исроил ака Ўзбекистонга хуш келибсиз. Авваламбор, жанг ҳақида қисқача тўхталиб ўтсангиз?
"Ассалому алайкум ҳаммага! Шунақа катта эътибор билан кутиб олганингиз учун раҳмат.
Жангга тўхталадиган бўлсак, яхши жанг бўлди. Жуда яхши тайёргарлик қилгандик, рақиб кучли ва тажрибали эканлигини билардик. Шунга яраша унга қарши тактика ишлатиб, 12 раунд яхши жанг қилдим деб ўйлайман. Тўғрисини айтсам, дунё бокси шу жангдан кейин ўзбек боксчиларига тан берди. Мени нокаут билан мағлуб бўлади деб ўйлашган эди. Улар ўйлаганидан кўра яхшироқ натижа кўрсатганимдан хурсандман.
Кетма-кет катта жанглар ўтказяпсиз. Биринчи камар учун, кейин эса камар ҳимояси учун. Кроуфорд учун жангга тахминан 5 ой тайёргарлик кўрдингиз ва бу кам бўлмадими?
Чемпионлик жангимга 5 ой бўлди, бу вақт ичида ўзимни тиклаб олдим. Мен камаримни Кроуфорд бўлмаса бошқаси билан бўлсада жанг қилиб ҳимоя қилишим керак эди. Ўйлайманки бу тўғри қарор бўлди.
Ҳакамларнинг баҳсли қарори ҳақида нима десиз?
Барча кўриб турганидек, жанг энг камида дуранг деб баҳоланиши керак эди. "Чемпиондан камарни олиш учун яққол устунлик билан ғалаба қозониш керак", - деб промоутер Эдди Хирн ҳам айтиб ўтди.
Кўплаб бокс юлдузлари ва экспертлар ҳам шуни таъкидлашмоқда. Мухлислар ҳам кўришди, кўпроқ устунлик мен томонда бўлди. Шу пайтгача АҚШда бунақа катта жанг ташкил қилинмаган ва Ўзбекистон мадҳияси янграмаган эди. Мен шу ишни амалга оширганимдан хурсанд қилди. Юртимиз шарафини муносиб ҳимоя қила олдим деб ўйлайман.
Жанг қарори баҳсли бўлди ва реванш бўлиши мумкинми?
Реванш бўйича менежерларимиз ишлашяпти. Албатта бу фақат менга эмас, Кроуфорднинг ҳам режаларга боғлиқ. Энди бошқа версияларда ҳам жанглар кўпаяди. Кейинги жанг ҳам камар учун бўлади, фақат бошқа йўналишда.
Жангдан сўнг унинг жамоасидагилар билан келиб жанг учун раҳмат айтишди. Чунки у 8 йилдан бери 12 раундлик жанг қилмаган эди. Кейинги жангларимга омад тилади. Истеъдодли экансан деди. Ринг ичида рақибмиз ташқарида эса, яхши ҳамкасб бўлиб олдик десам ҳам бўлади. Бу жангда бошқаларига қараганда ўзимни анча яхши ҳис қилдим. Орзуимдаги жанг бўлганлиги учундир, балки.