Ирисметов мундиалда плей-оффга чиқиш йўлини айтди
- 19-июн, 00:00
- Zohir Toshxo’jayev
- 0
- Футбол
Ўзбекистон миллий жамоасининг собиқ футболчиси Жаъфар Ирисметовнинг фикрича, юртдошларимиз 2026 йилги жаҳон чемпионатида гуруҳ босқичида ҳатто биринчи ўринни эгаллаш салоҳиятига эга.
Эслатиб ўтамиз, мусобақадаги илк учрашувда Ўзбекистон терма жамоаси Колумбияга 1:3 ҳисобида мағлуб бўлди. Гуруҳ босқичида қолган икки ўйин Португалия ва Конго Демократик Республикаси миллий терма жамоаларига қарши ўтказилади.
- Фабио Каннаваро, эҳтимол, таркиб ва тактикани кескин ўзгартирмас. Биз қарши ҳужумга жуда яхши чиқяпмиз, тўпни ушлаб тура оладиган футболчиларимиз бор, яхши ҳужумчиларимиз бор, масалан, Элдор Шомуродов.
Шунингдек, чуқурроқ зоналардан ҳужумга қўшиладиган, ўйинни кучайтириб берадиган йигитларимиз ҳам етарли, – дея таъкидлади Жаъфар Ирисметов.
Ирисметов бўлажак рақиб Португалия етакчиси ҳақида тўхталар экан, жамоа бир кишига эмас, умумий ўйинга эътибор қаратиши кераклигини айтди.
- Роналдуни қандай тўхтатиш мумкин? Ҳозир у қай даражада эканини аниқ билмайман. Менимча, каттароқ хавф Бруну Фернандеш ва бошқа футболчилардан келади.
Лекин барибир Роналду – бу Роналду. У ўйин давомида унчалик кўзга ташланмаслиги мумкин, аммо битта имкониятни голга айлантиришга қодир. Бу ишни жуда яхши уддалайди.
Шунинг учун уни алоҳида назорат қилиш мақсадида бир футболчини махсус бириктириш шарт, деб ўйламайман.
Биз жамоавий ўйинимиз билан кучлимиз. Агар биз португалияликларга катта бўшлиқ қолдирмасак, зич ва интизомли ўйнасак, уларни мағлуб этишимиз, камида майдонни ижобий натижа билан тарк этишимиз мумкин.
Тўғриси, энди қўрқадиган, йўқотадиган нарсамиз қолмади – қандай шароит бўлишидан қатъи назар, очко олишга ҳаракат қилишимиз керак.
Энг муҳими – мағлуб бўлмаслик, шундан кейин учинчи ўйинда ҳам очко олиш ҳақида ўйлаш мумкин. Албатта, Конго ҳам осон рақиб эмас, – деди Жаъфар Ирисметов.
Тажрибали мутахассиснинг фикрича, гуруҳдан чиқиш учун тўрт очко жамғаришнинг ўзи етарли бўлиши мумкин.
- Тўрт очко олсак, гуруҳдан чиқишга яхши имконият пайдо бўлади. Ё учинчи ўриндан, ё иккинчи ўриндан. Балки биринчи ўрин ҳам қўлимиздан келар, – дея хулоса қилди Жаъфар Ирисметов.