Инфантино: “Агар кимдир 2 миллионга финал чиптасини сотиб олса, ўзим унга хот-дог олиб келаман”

ФИФА президенти Жанни Инфантино 2026-йилги Жаҳон чемпионати ўйинлари чипталари нархининг танқид қилинишига ҳазил билан муносабат билдирди.

Аввалроқ чипталарнинг янги тоифаси жорий этилгани, уларнинг нархи 2300 долларгача етиши мумкинлиги хабар қилинганди.

“Агар кимдир икки миллион долларга финал чиптасини сотиб олса, мен унга шахсан ўзим хот-дог ва кола олиб келаман, шунда у вақтини яхши ўтказади.

Биз бозорни ҳисобга олишимиз керак, биз дунёдаги энг ривожланган кўнгилочар бозорга эга мамлакатда ишлаймиз. Шунинг учун биз бозор нархларини қўллашимиз керак. Қўшма Штатларда чипталарни қайта сотишга ҳам рухсат берилган. Шунинг учун, агар сиз чипталарни жуда паст нархда сотсангиз, бу чипталар анча юқори нархда қайта сотилади. Аслида, баъзи одамлар бизнинг нархларимиз юқори деб даъво қилишса ҳам, бу чипталар барибир қайта сотиш бозорида янада юқори нархда, икки баравар юқори нархда сотилади", - деди Инфантино Беверли-Хиллздаги анжуманда.

ФИФА президенти, шунингдек, гуруҳ босқичи чипталарининг 25 фоизи 300 доллардан кам (254 евро) туришини таъкидлади. Маълумотларга кўра, ФИФА аллақачон чипталар учун 500 миллиондан ортиқ ариза олган, аввалги иккита жаҳон чемпионатида эса бу кўрсаткич 50 миллионни ташкил этган.

2026 йилги жаҳон чемпионати 11 июндан 19 июлгача АҚШ, Канада ва Мексикада бўлиб ўтади.