Илҳом Мўминжонов: "Биз мураббийлар 10 ойлик мусобақани стрессда ўтказамиз"

Про-лига 5-туридан ўрин олган "Пахтакор" ФЖ – "Металлург" баҳсидан (0:5) кейин бекободликлар бош мураббийи Илҳом Мўминжонов матбуот анжуманида иштирок этди.

"Бугунги ғалаба билан мухлисларимизни, футболчиларни ва клубимиз раҳбариятини табриклайман. Секин-аста вазифани бажариб ўз мақсадимиз сари интиляпмиз. Энг қувонарлиси, футболчилар ўйиндан ўйинга қўшяпти. Жамоамиз борган сари биз мураббийлар хоҳлаган футболни намойиш этмоқда.

Футболда ўзи кетма-кет уч-тўртта ўйинда ютиш осон эмас, бу футболчиларга руҳан таъсир қилади. Менимча, бугунги баҳс бошларида шу рол ўйнади. Оддий мисол "Шўртан"ни олайлик, аввалги турда қийин рақибни мағлубиятга учратганди, бироқ бу турда "Яйпан" билан дуранг ўйнади. "Шўртан" яхши жамоа, лекин негадир кеча ўйини чиқмади.

Яширмайман, клубимизда босим анча юқори. Раҳбарият талаби катта. Буни билиб туриб жамоани қабул қилиб олганман. Биз мураббийлар ўн ойлик мусобақани стрессда ўтказамиз. Ўз пайтида "Нефтчи"да ҳам шундай бўлганди ва бу менга ёқади, бунга тайёрман. Иккинчи даврада таркибни янада кучайтиришни ният қилганмиз".