Ҳусановга қийин бўлади! “Арсенал” катта босим қиладиган бўлди
- 14-август, 08:16
- Zohir Toshxo’jayev
- 0
- Футбол
16 август куни Англиянинг амалдаги чемпиони “Арсенал” ва мамлакат кубоги соҳиби “Манчестер Сити” жамоалари Англия Суперкубоги учун ўзаро баҳс олиб боради.
Янги мавсумнинг илк расмий учрашуви машҳур “Уэмбли” стадионида эмас, балки Кардифф шаҳридаги аренади бўлиб ўтади. Шунга қарамай, Уэльс пойтахтида Англия чемпионининг мухлислари кўпроқ ташриф буюрадиган бўлди.
Football Ground Guide нашри маълумотларига кўра, “шаҳарликлар” Суперкубок ўйини учун ўзларига ажратилган чипталарнинг барчасини мухлисларга сота олмаган. Улар ўзлаштирмаган чипталарни энди рақиб жамоа – “Арсенал” тарафдорлари харид қилади.
Бундан келиб чиқиб, Кардиффдаги “Миллениум” стадионида мухлислар нисбати тахминан 75/25 фоиз кўринишида “Арсенал” фойдасига ҳал бўлиши кутилмоқда.
Стадион жами қарийб 74 минг мухлисни сиғдиради. Демак, дастлабки ҳисоб-китобларга кўра, “Манчестер Сити” мухлислари тахминан 18,5 мингта, “Арсенал” фанатлари эса қолган 55 мингта ўринни эгаллайди.
Экспертларнинг таъкидлашича, лондонлик футбол ишқибозлари чемпионлик тантанасини давом эттириш мақсадида “Арсенал”ни ҳар қачонгидан ҳам кучлироқ қўллаб-қувватлашга ва “Манчестер Сити” футболчиларига босим ўтказишга ҳаракат қилади.
Қолаверса, ўтган мавсум Англия лигаси кубоги финалида “Манчестер Сити” футболчилари “Арсенал”ни 2:0 ҳисобида мағлубиятга учратиб, бош совринга эга чиққан эди. Энди пойтахтлик мухлислар “канонирлар”га ўша мағлубият учун реванш олишга ёрдам беришни мақсад қилган.
Бу галги Англия Суперкубоги учрашуви 2006 йилдан буён “Миллениум” стадионида ўтказиладиган биринчи ҳолат бўлади. Бу йил учрашув Лондондаги “Уэмбли”дан кўчирилди, чунки худди шу куни стадионда The Weeknd’нинг “After Hours til Dawn” гастроль тури доирасида концерти режалаштирилган.