Ҳусанов қани? АҚШнинг нуфузли сайти Ўзбекистон юлдузларини санаб, Абдуқодирни инобатга олмади
- 23-май, 08:37
- Zohir Toshxo’jayev
- 0
- Футбол
2026 йилги жаҳон чемпионати яқинлашгани сари ҳар тўрт йилликнинг энг нуфузли мусобақасига оид материаллар, мақолалар, таҳлиллар, превьюлар кўпайиб бормоқда.
Хусусан, АҚШдаги манбалар ҳам мундиалга келадиган терма жамоалар, мураббийлар, футболчилар ҳақида турли маълумотларни тарқатмоқда.
Американинг нуфузли ва юз йиллик тарихга эга манбаларидан Times Union нашрлари бу галги жаҳон чемпионати дебютантлари – Кабо-Верде, Кюрасао, Иордания ва Ўзбекистон миллий терма жамоалари ҳақида мақола чоп этди.
Sports.uz портали мазкур нашр журналисти Кира Сантиколанинг Ўзбекистон миллий терма жамоаси ҳақида берган маълумотларини ўзбекистонлик футбол ишқибозлари эътиборига ҳавола этади:
Ўзбекистон миллий терма жамоаси илгари жаҳон чемпионатига чиқа олмаган энг кучли жамоалардан бири сифатида кенг танилган. Мамлакат 1991 йилда мустақилликка эришганидан кейин жамоа кетма-кет етти марта саралаш босқичида омадсизликка учради – кўп ҳолларда жуда кичик фарқ билан йўлланмани бой берди.
Қудратли жамоа доим қандайдир тўсиққа дуч келарди. Аммо энди ҳаммаси бошқача бўлди.
Йўлланма қандай олинди?
34 йиллик омадсиз уринишлардан кейин “Оқ бўрилар” ниҳоят мақсадга эришди ва Осиё футбол конфедерацияси (ОФК) саралашининг учинчи босқичида ўз гуруҳида иккинчи ўриндан жой олиб, тарихдаги илк жаҳон чемпионати йўлланмасини қўлга киритди.
Ўзбеклар 10 та ўйинда олтита ғалаба, учта дуранг қайд этиб, фақат бир маротаба мағлубиятга учради, сафарда Қатарга қарши баҳсда 2:3 ҳисобида ютқазди.
Қизиқарли факт
Ўзбекистон FIFA жаҳон чемпионатига чиққан Марказий Осиёдаги илк мамлакатга айланди.
Юлдуз футболчилар
Элдор Шомуродов – жамоа сардори ва терма жамоа тарихидаги энг яхши тўпурар бўлиб, 90 ўйинда 44 та гол урган. Аббосбек Файзуллаев эса чаққон ва ижодкор плеймейкер бўлиб, 2023 йил ОФКнинг энг яхши ёш футболчиси совринини қўлга киритган. У Ўзбекистоннинг барча ҳужум ҳаракатларида асосий куч ҳисобланади.
Таъкидлаш жоизки, шу ўринда Times Union ижодкорлари “Манчестер Сити” ўйинчиси Абдуқодир Ҳусановни назардан қочирган. 22 ёшли марказий ҳимоячи бугунги кунда юлдузлик даражаси ва машҳурлик бобида Элдордан ҳам, Аббосбекдан ҳам ўзиб кетган.
Истиқбол
Жаҳон рейтингида 50-ўринда турган ва мундиалнинг “K” гуруҳидан жой олган Ўзбекистоннинг ҳақиқий кучи рақиблар учун номаълум. Бу терма жамоа гуруҳдан чиқиш учун реал имкониятларга эга. Ўзбекистон миллий терма жамоаси тарихидаги илк мундиалини Мексикадаги афсонавий “Ацтека” стадионида Колумбияга қарши баҳс билан бошлайди. Кейин эса уларни Криштиану Роналду бошчилигидаги Португалия ва плей-оффдан чиққан Конго Демократик Республикаси терма жамоаларига қарши ўйинлар кутиб турибди.
Ўзбекистон энг юқори нуқтада: Жаҳон чемпионатида муваффақиятни кимлар таъминлайди?
Шомуродов ва Файзуллаевни Премьер-лига клублари кутяпти