Ҳусанов-чи? “Манчестер Сити” барча юлдузлари тарқалиб кетадиган бўляпти

Сўнгги ойларда «Манчестер Сити» юлдузларига Европа гранди клублари томонидан қизиқиш ортиб бораётгани ҳақида турли хабарлар тобора кўпаймоқда. Бунинг замирида мантиқий сабаб бор: аввалроқ «шаҳарликлар» молиявий қоидаларни бузгани учун айбдор деб топилган, энг ёмон сценарийда эса клуб Англия Премьер-лигасидан чиқариб юборилиши мумкинлиги айтилмоқда. 

Бундай ҳолатда Эрлинг Холанд, Жанлуижи Доннарумма, Фил Фоден каби етакчилар қуйи лигаларда ўйнаш учун жамоада қолиши қийин масала. Sports.uz портали хорижлик экспертларнинг айни пайда бу борада билдираётган турли мулоҳазаларини ўқувчилар эътиборига ҳавола қилади. 

Келинг, тасаввур қиламиз: «Манчестер Сити» ростдан ҳам Премьер-лигадан четлатилди. Бундай шароитда клубнинг Европа даражасидаги топ-жамоа сифатидаги мақомига нуқта қўйилиши эҳтимоли катта. Чунки ҳозирги таркибда клубни оғир дамларда қўллаб-қувватлашга тайёр бўлган садоқатли ўйинчилар кўринмаяпти. Турихдан маълумки,  2000-йиллар ўртасида «Ювентус» қуйи лигага тушириб юборилгач, Павел Недвед, Алессандро Дель Пьеро ва Жанлуижи Буффон каби юлдузлар Туринда қолган эди. Манчестер суперклубида эса  ўз фаолиятини қуйи лигада давом эттиришга кўнадиган катта фигуралар кўринмаяпти.

Эслатиб ўтамиз, 2006 йилда «Ювентус» жуда қаттиқ жазога дуч келганди: клуб юқори дивизионда В Серияга туширилди, икки чемпионлик унвонидан маҳрум этилди. Бироқ «Ювентус» иши молиявий қоидалар эмас, клуб раҳбарларининг ҳакамлар тайинловига таъсири билан боғлиқ катта можаро доирасида кўрилганди. Ўшанда «Ювентус» сафида жамоа билан бирга қолиб, уни яна чўққига олиб чиққан футболчилар топилган. Шу билан бирга, катта йўқотишлардан қочиб бўлмаганди: масалан, Златан Иброҳимович «Интер»га ўтди, Фабио Каннаваро эса «Реал» сафига йўл олди.

Эндиликда яна «Манчестер Сити»га қайтамиз. Хориж оммавий ахборот воситаларида ҳозирча энг кўп муҳокама қилинаётган мавзу — Эрлинг Холанднинг 2027 йилда жамоани тарк этиш эҳтимоли бўлиб турибди.  Норвегиялик ҳужумчига узоқ йиллардан буён орзу қилиб келаётган «Реал» ва «Барселона»дан ташқари, ҳужум чизиғида юлдузга қаттиқ муҳтож бўлган Лондоннинг «Арсенал» клуби ҳам даъвогарлар қаторига қўшилгани айтилмоқда. Холанднинг «Эмирейтс»га кўчиб ўтишига ишониш қийин, аммо у Испания чемпионатида ўйнашни ўзи ҳам орзу қилаётгани ҳақида хабарлар кўп.

Бу ерда ҳатто «Манчестер Сити»нинг Чемпионшипга тушиши ҳақида гапирмасак ҳам бўлади. Холанд каби улкан фигура жамоа АПЛда қолган тақдирда ҳам, агар клуб еврокубоклардан четлатилса, қолишни истамаслиги табиий. Интернетда тарқалаётган маълумотларга кўра, «шаҳарликлар» учун эҳтимолий жазолардан бири — бир неча мавсум давомида шунчалик кўп очко олиб ташлашки, жамоа Чемпионлар лигасига йўл олиш имконидан мутлақо маҳрум бўлиши мумкин.

Шуни инобатга олиш керакки, «Манчестер Сити» нисбатан яқин йиллардагина ҳақиқий топ-клубга айланди. Клуб афсонаси дейиш мумкин бўлган футболчилар сони ҳали кўп эмас, дунё даражасидаги ўз тарбияланувчилари эса саноқли. Агар қаттиқ санкциялар қўлланса, айнан шу жиҳат «шаҳарликлар» учун энг катта муаммога айланиши мумкин. Ҳозирги таркибдан фақат Фил Фоден ва Рико Льюисни шартли равишда келажак рамзлари сифатида тилга олиш мумкин, холос. Лекин улардан кимдир клубда қолишни истармикан?

Яқинда «Бавария»нинг Фоденга жиддий қизиқаяпти, деган хабарлар пайдо бўлди. Мюнхен клуби айнан шундай услубдаги футболчига қаттиқ муҳтож. Бундай даражадаги ўйинчи, клубни жуда яхши кўришига қарамай, ноаниқ келажак шароитида «Манчестер Сити»да қолишига ишониш қийин.

Жамоага яқинда келиб қўшилган Энцо Фернандес ҳам ўзини янги клуб билан таъминлаб олиши қийин бўлмайди. Ўтган ёзда аргентиналик ярим ҳимоячини қўлга киритишни «Реал» жуда истаганди, аммо томонлар келишувга эриша олмади. Эҳтимол, Энцонинг Мареска қўл остида яна ишлаш истаги устун келгандир. Бироқ вазият ўзгарса, «Қироллик клуби» Фернандесни арзонроқ нархда қўлга киритиш имкониятини қўлдан бой бермаслиги аниқ.

Райан Шерки, Жереми Доку ёки Айюб Буадди каби ёш юлдузлар ҳақида гапиришнинг ўзи ортиқчадек. Уларнинг ортидан, «Манчестер Сити»нинг бошқа кўплаб футболчилари сингари, катта навбат пайдо бўлиши табиий.

Шундай экан, назарий жиҳатдан клубда ким қолиши мумкин? Аниқки, катта юлдузлар кетганидан сўнг асосий урғу захирадагилар ва академия тарбияланувчиларига қаратилади. Аммо шунга қарамай, асосий таркибдан ҳам кимнидир сақлаб қолиш эҳтимоли бор. Масалан, Абдуқодир Ҳусановни олайлик.

Ўзбек футболчиси характери билан ҳақиқий жангчи, у эндигина энг юқори даражадаги футбол саҳнасига қадам қўйди. Ёши 22 да, лекин ёзда «Манчестер Сити» билан тузган шартномаси эса узоқ муддатга мўлжалланган. Нега у қолиб, санкциялардан кейин клубни яна чўққига олиб чиққан футболчилардан бири сифатида тарихга кирмаслиги керак?

Эҳтимол, Ҳусановнинг ўзи ҳам бундай қарор «шаҳарликлар» мухлислари кўзида унинг обрўсини янада оширишини яхши тушунар. Клуб оғир аҳволда бўлган бир пайтда жамоада қолиш — ҳар қандай футболчи учун катта синов ва бир вақтнинг ўзида катта имконият ҳамдир.

Балки бир неча йилдан сўнг бугунги «Манчестер Сити»ни таниб бўлмас: одатдаги шукуҳ, мақом, юлдузли таркиб ва миллиардлаб сарф-харажатларсиз янги жамоа шаклланар. Аммо агар клубга ҳақиқатан ҳам ҳаммасини нолдан бошлашга тўғри келса, айнан шундай паллаларда янги қаҳрамонлар юзага чиқади. Абдуқодир Ҳусанов шундай қаҳрамонлардан бирига айланишга тўлақонли имкониятга эга ва бунга ҳақли.

Ана холос: Ўзбекистон миллий терма жамоаси кейинги ой Россия билан ўйнаши кутиляпти

Шомуродовнинг голсиз ўйини қандай баҳоланди?

Каннаваро Италиянинг машҳур нашрига ўзбек футболидаги янги вундеркинд ҳақида гапириб берди

Ҳусанов кутилмаган хушхабар олди!