Ҳусанов, дўстингни табриклаб қўй!
- 6-август 2025, 07:11
- Zohir Toshxo’jayev
- 0
- Футбол
Ўзбекистон миллий терма жамоаси марказий ҳимоячиси Абдуқодир Ҳусанов “Манчестер Сити” шарафини ҳимоя қилаётганини инобатга олиб, sports.uz портали ушбу клуб фаолиятига оид хабарларни ўзбекистонлик футбол ишқибозлари эътиборига ҳавола қилишни давом эттиради.
“Манчестер Сити” раҳбарияти ўтган йилги инқироздан кейин таркибни қайта шакллантириш ишларини жадал давом эттирмоқда. Хосеп Гвардиола бу борада учта йўналишда иш олиб боряпти.
Биринчиси, жамоага янги ижрочиларни жалб этиш бўлиб, у январь ойида Абдуқодир Ҳусанов трансферини амалга ошириш орқали бошланган. Ўзбек ҳимоячиси Манчестерга келган 20 январдан бери клуб ўз сафига Нико Гонсалес, Жума Ба, Умар Мармуш, Витор Рейс, Тижани Рейндерс, Райан Айт-Нури, Райан Шерки, Серре Нюпан ва Жеймс Траффордни қўшиб олди.
Иккинчи йўналиш ёши ўтиб қолган футболчилар билан хайрлашишга қаратилган ва ҳозиргача Кевин де Брюйне, Скотт Карсон, Кайл Уокер сингари футболчилар жамоани тарк этиб бўлди. Ёзги трансферлар ойнаси ёпилгунича яна бир неча ўйинчи бошқа клубларга ўтиши кутилмоқда.
Шунингдек, учинчи йўналишда клуб Хосеп Гвардиоланинг ишончини оқлаб келаётган ўйинчилар билан янги битим тузишга қаратилган. Хусусан, “шаҳарликлар” жамоанинг етакчи марказий ҳимоячисига айланган Рубен Диашга янги шартнома берилишини маълум қилди.
Таниқли инсайдер Давид Орнштейннинг хабар беришича, “Манчестер Сити” мутасаддилари Диаш билан музокарага киришиб, 28 ёшли ўйинчини ҳамкорликни давом эттиришга кўндирган. Португалиялик футболчининг амалдаги келишуви 2027 йилнинг ярмигача тузилган эди. Унга узоқ муддатли шартнома тайёрланяпти.
Таъкидлаш жоизки, Рубен Диаш асосий таркиб учун курашда Абдуқодир Ҳусанов билан дўстона муносабатга эга ва шунга қарамай, асоси таркиб учун рақобатда ҳамюртимизнинг асосий рақобатчиларидан ҳисобланади. Ҳозирги пайтда ҳимоя марказидаги икки ўрин учун Диаш ва Ҳусановдан ташқари Мануэль Аканжи, Йошко Гвардиол, Жон Стоунз, Натан Аке даъвогарлик қилмоқда.
Рубен Диаш 2020 йилдан бери “Сити” аъзоси ҳисобланади. Манчестерликлар бу ўйинчини қўлга киритиш учун уни тарбиялаган “Бенфика” 71,6 миллион евро бадал пули тўлаган.
Холанд АҚШга кетиши мумкинлигини айтди
“Манчестер Сити”нинг кейинги йиллардаги асосий тўпурари Эрлинг Холанд футболчилик фаолиятида келажакда АҚШда ўйнашга тайёрлигини билдирди.
- Келажак сенга нималар тақдим қилишини хеч қачон олдиндан била олмайсан. Ҳозир Лионель Месси қилаётган ишлар одамнинг ақлини шоширади. Хусусан, Дэвид Бекхэм ҳам шундай ҳайратланарли ишларга қўл урган, - деди Эрлинг Холанд.
Норвегиялик тўпурар январь ойида “Манчестер Сити” билан ҳамкорликни 2034 йилнинг ярмигача узайтирди. Бироқ бу келишувда тўпурарга жамоани тарк этиш имконини берувчи бандлар борлиги айтилмоқда.
Тобора кучайиб бораётган МЛС чемпионатида АҚШ ва Канада жамоалари иштирок этади. Ўз даврида Тьерри Анри, Кака, Фрэнк Лэмпард, Уэйн Руни каби Европада порлаган юлдузлар МЛС клубларида ҳам ўйнаган эди. Айниқса, 2023 йилнинг ёзида Лионель Мессининг “Интер Майами”га кўчиб ўтгани ва ҳозиргача бу клубда ўйнаётгани мазкур мусобақага эътиборни янада кучайтирди.
Ҳаммаси тугади! Ҳусановнинг устозидан нохуш хабар
Файзуллаев нега Еврокубокларда ўйнамаяпти?
Гвардиола Ҳусанов “ғажиб ташлаган” юлдузни олиб келмоқчи