Ҳужумкор легионеримиз Премьер-лигадан янги жамоа топди
- 25-январ 2025, 21:43
- Zohir Toshxo’jayev
- 0
- Футбол
Ўзбекистон миллий терма жамоаси ҳужумкор футболчиси Шаҳбоз Умаров Қозоғистон Премьер-лигасида “Ордабаси” сафида уч мавсум тўп тепганидан кейин яқинда Чимкент клубини тарк этган эди.
25 ёшли футболчимизнинг қозоқ клубидаги фаолияти ёрқин бўлди. Шаҳбоз чимкентликлар таркибида мамлакат кубоги ва миллий чемпионатда ғолиб чиқди. 31 декабрь куни клуб билан шартномаси якунланган футболчисиз айни пайтда расман эркин агент ҳисобланади.
Қозоғистон футболини ёритиб келаётган манбаларнинг хабар беришича, Шаҳбоз Умаров фаолиятини Туркистон вилоятининг “Турон” жамоасида давом эттириши юқори. Айни пайтда ўзбек футболчиси бу жамоанинг Туркияда ташкил этилган хорижий ўқув-машғулот йиғинида иштирок этмоқда.
Умаров Белек шаҳрида Чехиянинг “Гралец-Кралове” жамоасига қарши ўтказилган ўртоқлик учрашувида майдонга тушди. Бу баҳсда рақиб 6:2 ҳисобида зафар қучди.
Таъкидлаш жоизки, “Турон” ўтган мавсумни 12-поғонада якунлади ва Премьер-лигадаги жойини сақлаб қолди.
Шаҳбоз Умаров аслида “Пахтакор” тарбияланувчиси ҳисобланади. Лекин пойтахтликлар асосий таркибига кира олмаганидан кейин фаолиятини Олмалиқда давом эттирган.
Икки йил ОТМК жамоаси шарафини ҳимоя қилган Умаров бу жамоа сафида Ўзбекистон кубоги соҳиби бўлди.
2020 йилнинг ёзида истеъдодли футболчи легионерга айланди. Беларуснинг “Энергетик-БГУ” жамоасида бир йил тўп тепганидан кейин уни ушбу мамлакатнинг етакчи жамоаси – БАТЭ ўз сафига қўшиб олди.
Майдонда бир неча позицияда ўйнай оладиган Шаҳбознинг Борисов шаҳри жамоасидаги дебют мавсумида жуда самарали ўйин кўрсатди. Бироқ кейинги мавсум олдидан иши орқага кетди. Бош мураббий билан уришиб қолган ҳамюртимизни мураббийлар штаби ярим йил давомида майдонга туширмади.
БАТЭ раҳбариятимураккаб вазиятни юмшатиш мақсадида легионеримизни кейинчалик сотиб олиш ҳуқуқи билан Қозоғистоннинг “Ордабаси” жамоасига ярим йилга ижарага берди.
Ўзбек легионери Беларусни қуруқ тарк этгани йўқ. БАТЭ сафида мамлакат кубогини қўлга киритди.
Умаров қўшни давлат чемпионатига кўчиб ўтганидан кейин ўз иқтидорини намойиш қила олди ва чимкентликларнинг асосий ўйинчисига айланди. “Ордабаси” ўзбек футболчисининг трансферини тўлиқ сотиб олди.
Ҳужумкор футболчимизнинг профессионал фаолиятига назар солсак, у ОТМКда 20 та учрашувда битта ассист қайд этган. Беларуснинг икки клуби – “Энергетик-БГУ”да 31 та ўйинда тўртта гол, учта ассист, БАТЭда 36 та беллашувда олтита тўп киритиб, тўққизта голли пас узатди.
Умаровнинг “Ордабаси”даги ҳаракатлари мухлису мутахассисларга манзур бўлди. Жами 77 та баҳсда иштирок этган ҳамюртимиз еттидан гол ва ассист муаллифи бўлди.
Шаҳбоз Ўзбекистон миллий терма жамоасига номзод футболчи ҳисобланади. У ҳозиргача халқаро миқёсда бешта расмий учрашув ўтказган.
Ҳусановда бизда йўқ сифатлар бор! Гвардиола Абдуқодирнинг қайси кучли томонларини санаб ўтди?
“Ливерпуль” афсонаси Ҳусанов трансферига қандай баҳо берди?
Ҳусановнинг трансфери ўзбек футболчилари учун Европага йўл очадими?