Гвардиола ашаддий рақибдан ўйинчи оладиган бўлди

“Манчестер Сити” раҳбарияти “Ливерпуль”дан Кёртис Жонсни олишни режалаштирмоқда.

25 ёшли ярим ҳимоячининг “Энфилд” эгалари билан шартномаси тугаш арафасида. Муддат 12 ой қолган ва унга янги битим берилгани йўқ.

Бу футболчини Пеп Гвардиола жамоасининг ярим ҳимоясини кучайтириш учун қимматли вариант сифатида кўрмоқда. Хабарларга кўра, “шаҳарликлар” раҳбарияти “Ливерпуль” академиясининг энг ёрқин тарбияланувчиларидан бири бўлган ўйинчини ёзда трансфер қилиш устида иш бошлаган.

Таъкидлаш жоизки, ҳар икки клубнинг ўзаро рақобати туфайли “Манчестер Сити” ва “Ливерпуль” ўртасида тўғридан-тўғри битимлар тарихан кам учрайди.

Бироқ мерсисайд клубининг айрим асосий ўйинчилари шартномалари бўйича ноаниқлик бошқа клублар учун имконият ойнасини очди.

Anfield Watch маълумотига кўра, “Манчестер Сити” Премьер-лиганинг бир нечта етакчи клублари қаторида шартномаси ёзда тугайдиган ва шу сабабли жамоани тарк этиши мумкин бўлган Кёртис Жонсни сотиб олишга қизиқяпти.

Кёртис Арне Слот қўл остида бу мавсумда юқори дивизионда 28 та ўйинда яхши натижалар кўрсатганига қарамай, асосий таркибда мустаҳкам ўрин эгаллаши қийин бўлмоқда.