Грандклуб битта ўйинчи учун учта юлдузни бермоқчи
- 2-июл 2025, 17:32
- Zohir Toshxo’jayev
- 0
- Футбол
Италиянинг машҳур клубларидан “Ювентус” келаси мавсумда чемпионлик учун курашишни мақсад қилган. Туринликлар чемпионат олдидан таркибни сезиларли даражада кучайтирмоқчи.
Бош мураббий Игор Тудорга “Манчестер Юнайтед”га керак бўлмай қолган Жейдон Санчо маъқул келган. Италия клублари одатда ўйинчилар учун катта бадал пули тўламайди. Шу боис, Турин суперклуби “Манчестер Юнайтед” мутасаддиларига рокировка таклиф қиляпти.
Таниқли инсайдер Фабрицио Романога кўра, Манчестер клуби вакиллари Санчо трансфери доирасида Туриндан кетишга тайёр турган тўпурар Душан Влахович, Англияда ўйнаш тажрибасига эга Дуглас Луис ва ҳужумкор футболчи Тимоти Веадан бирини танлаши мумкин.
Transfermarkt экспертлари ҳозирги пайтда Влаховични 35, Дуглас Луисни 30 ва Веани 17 миллион еврога баҳоламоқда. Ўз даврида нархи 100 миллион евро атрофида бўлган 25 ёшли Жейдон Санчонинг бугунги кундаги трансфер суммаси 28 миллион еврони ташкил қилади.