Гранд клублар ўзбекистонлик 17 ёшли янги талант учун кураш бошлади
- 18-декабр 2024, 23:59
- Zohir Toshxo’jayev
- 0
- Футбол
Кейинги йилларда ўзбек футболида тарбияланган истеъдодли ёшлар Европанинг бир неча жамоалари эътиборини тортиб келмоқда. Буни ўзбек футболининг ютуғи сифатида баҳолаш мумкин.
Ўзбекистоннинг турли ёшдаги терма жамоаларининг халқаро миқёсидаги мусобақаларда муваффақиятли иштирок этаётган янгидан янги номларни кашф этиб бермоқда. Хусусан, сўнгги икки йилда Абдуқодир Ҳусанов “Ланс”нинг, Аббосбек Файзуллаев ЦСКАнинг етакчи ўйинчиси айланди.
Муҳаммадали Ўринбоев Англия “Брентфорд” клубида малака ошириб қайтганидан Европанинг бир неча лигаларидаги клублар эътиборига тушди. Лазиз Мирзаев куни кеча Испаниянинг “Леганес” жамоаси қўшилганини испан клуби расман эълон қилди.
Шу ўринда, Россия Премьер-лигасидаги легионерларимиз сафи ҳам кенгайиб бораётгани ўзбекистонлик футбол ишқибозларини бу мамлакат чемпионатини мунтазам кузатиб боришига туртки бўлмоқда.
Охирги икки йилда Россия клубларига қўшилган ўйинчиларимизнинг аксарияти ёш ўйинчилар. Улар орасида фақатгина Рустамжон Ашурматовнинг тажрибаси катта. “Рубин”нинг 28 ёшли ўзбек ҳимоячиси Қозон шаҳрига йўл олгунга қадар Ўзбекистон ва Жанубий Корея лигаларида катта тажриба тўплаган.
Бироқ унинг ёнида ўйнаётган 21 ёшли Умарали Раҳмоналиев, ЦСКА етакчисига айланган 21 ёшли Аббосбек Файзуллаев, “Акрон”да ўйин амалиётига эга бўлаётган 21 ёшли Шерзод Эсонов ва “Химки”га бориб қўшилган 23 ёшли Алишер Одилов катта футболга кириб келганига ҳали кўп бўлмаган янги авлод вакилларидир.
Сўнгги маълумотларга қараганда, Россия Премьер-лигасидаги легионерларимиз сони янада ошиши кутилмоқда. Таниқли инсайдер Иван Карповнинг маълум қилишича, Россия гранд клублари нишонига 17 ёшли Азизбек Тўлқинбеков тушган.
Манбага кўра, истеъдодли ҳимоячини “Спартак”, “Зенит” ва ЦСКА ўз сафига қўшиб олишни мўлжалламоқда.
Азизбек Тўлқинбеков “Бунёдкор” тарбияланувчиси. Универаллиги билан ажралиб туради. Асосий амплуаси марказий ҳимоячи. Бироқ ўнг қанот ҳимоячиси ва таянч ярим ҳимоячи сифатида ғам ўйнай олади.
The Guardian нашри ҳамюртимизни 18 ёшгача бўлган дунёнинг энг иқтидорли 60 нафар энг иқтидорли футболчилари рейтингига киритган.
Азизбек Тўлқинбеков Ўзбекистон U-17, U-20, U-21 терма жамоаларида мунтазам ўйнаб келмоқда.
“Бунёдкор” сафида Ўзбекистон Суперлигасида 17 та учрашувда иштирок этиб, жами 1017 дақиқа майдонда ҳаракат қилди. Шунингдек, мамлакат кубоги доирасида тўртта ўйинда қатнашиб, ҳимоядаги вазифаларини уддалашдан ташқари, ўз ҳисобига битта гол ҳам урди.
Тўлқинбековнинг пойтахт клуби билан амалдаги шартномаси 2026 йилнинг 31 декабрига қадар давом этиши белгиланган. Ёш футболчи ҳозир Transfermarkt портали томонидан 250 минг еврога баҳоланмоқда.
Демак, қишки трансферлар вақтида Азизбек Тўлқинбеков атрофидаги вазиятни кузатиб борамиз. Тез орада у ҳам футболчи акалари изидан бориб, легионерга айланиши мумкин...