Германия терма жамоаси йиғинида заҳарли илон пайдо бўлди

Германия миллий терма жамоаси футболчилари "ЖЧ-2026" вақтида кутилмаган ҳолатга дуч келишди.

Ярим ҳимоячи Йозуа Киммихнинг маълум қилишича, жамоа АҚШнинг Уинстон-Сейлем шаҳридаги йиғини вақтида заҳарли илонни кўриб қолган.

“Бизга унинг заҳарли эканини айтишди. Агар чақиб олса, шифохонага боришга тўғри келади. Ўлимга олиб келмаслиги мумкин, аммо барибир хавфли”, — деди Киммих.

Маълум қилинишича, гап АҚШда кенг тарқалган мисбош қалқонтумшуқ (copperhead) туридаги илон ҳақида кетмоқда.

Эслатиб ўтамиз, Германия терма жамоаси "ЖЧ-2026"даги илк баҳсида Кюрасаони 7:1 ҳисобида мағлуб этиб, “E” гуруҳида пешқадамга айланган. Кейинги учрашув 21 июнь куни Кот-д’Ивуарга қарши бўлиб ўтади.