Фузайлов ҳали ғалаба қозонмаган жамоани қабул қилиб олди. У қутқара олармикин?

Мухлисларимизга яхши таниш бўлган тожикистонлик мутахассис Ҳаким Фузайлов юртимизда охирги бор Урганчнинг “Хоразм” жамоасида ишлаганидан хабарингиз бор.

У 2024 ва 2025 йилги мавсумларда ушбу клубни бошқарди. Про лигадан Суперлигага олиб чиқишга муносиб ҳисса қўшди. Аммо кейин натижалар кутилганидек чиқмади. Натижада раҳбарият Ҳаким Қаюмовични клубда бошқа лавозимга ўтказди. Аниқроғи, йил бошида “Хоразм”да маслаҳатчи сифатида ишлаб келаётганди. Яқинда эса ушбу жамоадан бутунлай кетди.

Фузайлов “Хоразм” устози сифатида 59 та ўйинда иштирок этди. 15 ғалаба, 16 дуранг ва 28 мағлубият қайд этилди. Тўплар нисбати 69\77.

Шу тариқа, Ҳақим Қаюмовичнинг у ердаги миссияси якунланди ва орадан кўп ўтмасдан янги иш жойига эга бўлди. Эндиликда у Қирғизистон чемпионатида “Киргизалтин” жамоаси бош мураббийига айланди.

Эътиборлиси, Қирғизистон “Жокрогу лига”сида 16 та иштирокчи орасида “Киргизалтин” 11 та ўйинда атиги 2 очко жамғариб, охирги ўринда боряпти. 2 дуранг ва 9 мағлубият, ғалаба йўқ! Ҳаким Фузайлов қаерга ва нима учун бораётганини яхши тушуниб турганди. У қутқарувчи вазифасида ишга киришди. Мақсад жар ёқасига келиб қолган клубни қутқариш.

Фузайлов бой мураббийлик тажрибасига эга. Боиси, у кўплаб клубларда, жумладан юртимизда “Хоразм”дан аввал “Бухоро”, “Динамо”, “Андижон”, “Локомотив” жамоаларини бошқарган, Тожикистонда миллий терма жамоани, “Истиқлол”, “Куктош” ва “Хўжанд” жамоаларига устозлик қилган. Шунингдек, Россияда “Локомотив”, “Ростов”, “Титан”, “Терек” сингари клубларда турли лавозимларда иш олиб борган.

Ҳаким Қаюмович “Киргизалтин”ни жарликдан қутқара олармикин? Бу борада у енг шимариб ишга киришишига тўғри келади. Қолганини вақт кўрстади.