ФИФА мундиалдаги можародан кейин қоидаларни ўзгартирмоқчи

ФИФА тўғридан-тўғри кўрсатилган қизил карточкалар учун автоматик равишда бериладиган бир ўйинлик дисквалификацияни вақтинча тўхтатиб туришни тақиқлашни режалаштирмоқда. Бу ҳақда The Telegraph нашри хабар берди.

Қоидаларга ўзгартиш киритиш ташаббуси АҚШ терма жамоаси ҳужумчиси Фоларин Балогун билан боғлиқ можародан сўнг пайдо бўлди. У Жаҳон чемпионати–2026 давомида дарҳол майдондан четлатиш жазосидан қутулиб қолгани катта баҳсларга сабаб бўлган эди.

Таклиф этилаётган ўзгартиш ФИФА кенгаши муҳокамасига қўйилди. Қизиғи шундаки, бу масала кун тартибига сўнгги дақиқаларда қўшилди: икки ҳафта олдин эълон қилинган дастлабки кун тартибида фақат интизомий тартиб-қоидаларни қайта кўриб чиқиш назарда тутилган эди, холос.

Янгилик қабул қилинса, у фақат автоматик бир ўйинлик дисквалификацияларга тааллуқли бўлади. Ундан кўпроқ муддатга белгиланадиган жазоларни вақтинча тўхтатиб туриш имконияти эса сақланиб қолади. Эслатиб ўтамиз, ФИФА аввалроқ Португалия терма жамоаси етакчиси Криштиану Роналдуга нисбатан жазони юмшатган, у Ирландияга қарши жаҳон чемпионати саралаш баҳсида майдондан четлатилганидан сўнг дисквалификация муддати қисқартирилган эди.