ФИФА 2026 йилги Жаҳон чемпионатида Эронни Италияга алмаштирмоқчи эмас
- 23-апрел, 18:44
- Ali Ahmadxo’jayev
- 0
- Футбол
ФИФА ёзда бўлиб ўтадиган жаҳон чемпионатида Эрон терма жамоасини Италияга алмаштиришни режалаштирмаяпти, деб хабар бермоқда BBC турли манбаларга таяниб.
Аввалроқ АҚШ президенти Доналд Трампнинг махсус вакили Паоло Дзамполли шундай таклиф билан чиққан эди. АҚШ ва Исроил билан уруш туфайли Эроннинг турнирда иштирок этиши борасида ноаниқлик сақланиб қолмоқда.
ФИФА Дзамполлининг таклифига расман изоҳ бермади, бироқ ФИФА президенти Жанни Инфантинонинг ўтган ҳафта "Эрон жамоаси албатта келади" деган баёнотига ишора қилди.
Financial Times газетасининг хабар беришича, Дзамполлининг режаси АҚШ ва Италия ўртасидаги келишмовчиликларни ҳал қилиш учун бош вазир Жоржа Мелони Трампни Рим папаси Лев XIVга нисбатан билдирган фикрлари учун танқид қилганидан кейин таклиф қилинган.
ФИФА қоидаларига кўра, агар жамоа иштирок этишдан бош тортса ёки турнирдан четлатилса, нима бўлишини ҳал қилиш учун бошқарув органи "мутлақ ҳуқуққа" эга. Жаҳон чемпионати регламентининг олтинчи моддасида ҳам шундай дейилган: "ФИФА тегишли иштирокчи ассоциацияни бошқа ассоциация билан алмаштириш тўғрисида қарор қабул қилиши мумкин."
Италия терма жамоаси саралаш плей-офф босқичида Босния ва Герсеговинадан мағлуб бўлгач, кетма-кет учинчи бор жаҳон чемпионатига чиқа олмади.