FIDE президентлигига 3 нафар номзод қолди. Самарқанддаги сайлов қизғин бўлиши кутилмоқда
- 27-июл, 17:24
- Oybek Yo’ldoshev
- 0
- Шахмат
FIDE президентлиги учун курашда уч номзод қолди. Илюмжинов рўйхатдан ўрин олмади
FIDE матбуот хизмати 2026 йилги президентлик сайловида қатнашадиган номзодларнинг якуний рўйхатини эълон қилди.
Унга кўра, 26 сентябрь куни Самарқандда бўлиб ўтадиган сайловда уч нафар номзод FIDE президенти лавозими учун кураш олиб боради:
Ян Хенрик Бюттнер (вице-президентликка номзод — Малкольм Пейн);
Вадим Розенштейн (вице-президентликка номзод — Гордон Тан);
Тимур Турлов (вице-президентликка номзод — Вишванатан Ананд).
Сўнгги вақтларда ўз номзодини илгари суриш нияти ҳақида фаол баёнотлар бериб келган FIDEнинг собиқ президенти Кирсан Илюмжинов эса якуний рўйхатдан ўрин олмади.
Аввалроқ уни қўллаб-қувватлаган Андрей Филатов бу ҳолатга қуйидагича изоҳ берди:
«Кирсан Николаевич шахмат оламининг улкан шахсларидан бири. Унинг ФИДЕ раҳбарлигига қайтишдан кўзлаган асосий мақсади шахмат жамоатчилигини бирлаштириш эди. Эҳтимол, у ўз вазифасини бажарилган, деб ҳисоблагандир. Ёки номзодлар орасида муносиб инсонлар борлигини кўриб, хотиржам ҳолда бошқа йўналишларга эътибор қаратишга қарор қилгандир».
Шу билан бирга, шахмат муҳитида бу воқеага ҳазиломуз муносабат ҳам билдирилмоқда. Айтишларича, Магнус Карлсенни жаҳон чемпионлиги циклига қайтариш ғоясига шунчалик берилиб кетган эканки, ўз номзодлик ҳужжатларини ўз вақтида тўғри расмийлаштиришни унутиб қўйибди.
Эслатиб ўтамиз, FIDE президентлиги сайлови 26 сентябрь куни Самарқанд шаҳрида бўлиб ўтади.