“Фенербаҳче” сардори ўйинларга пул тиккани учун дисквалификация қилинди

Туркиянинг “Фенербаҳче” клуби ярим ҳимоячиси ва жамоа сардори Мерт Ҳакан Яндаш ўйинларга пул тиккани учун бир йилга футболдан четлатилди. Бу ҳақда Туркия футбол федерацияси матбуот хизмати хабар берди.

Қарор интизом қўмитаси томонидан қабул қилинган. Маълум қилинишича, футболчи келишилган ўйинлар иши доирасида тўрт ой давомида ҳибсда сақланган ва 3 апрель куни озод этилган.

31 ёшли Яндаш 2020 йилдан буён “Фенербаҳче” сафида тўп суриб келмоқда. У жамоа таркибида 149 та учрашувда майдонга тушиб, 11 та гол ва 25 та голли узатмага муаллифлик қилган. Футболчи жамоа билан бирга 2023 йилда Туркия Кубоги ва 2025 йилда Суперкубок соҳиби бўлган.