Файзуллаевнинг таъсири Шомуродовникидан ўтиб кетди

Ўзбекистон миллий терма жамоаси ҳужумкор футболчиси Аббосбек Файзуллаев ЦСКАдан Туркиянинг “Истанбул Башакшеҳир” клубига ўтиши кутиляпти.

Туркия Суперлигасида юқори ўринлар учун курашишни мақсад қилган бу клуб яқинда “Рома”дан Элдор Шомуродовни олиб келган эди. Энди Аббос ҳам айнан мана шу жамоа шарафини ҳимоя қиладиган бўляпти.

Бугунги кунда миллий терма жамоамизнинг етакчиларига айланган ҳар икки ўйинчининг фаолиятида Россия чемпионати муҳим аҳамият касб этади. Элдор Шомуродов Европанинг “топ-5” лигалари қаторига кирувчи А Серияга кўчиб ўтгунга қадар “Ростов” клубида уч йил тўп тепган эди.

Аббосбек Файзуллаев эса, 2023 йилнинг августида “Пахтакор”дан ЦСКАга трансфер қилинган ва қисқа фурсатда ҳар қандай чемпионатда ёрқин ўйнай олишини намойиш қилди.

Россиялик журнаоист Александр Троицкий ҳар икки ўзбек футболчисининг Россия футболига таъсирини ўзаро қиёслади.

Sports.uz  портали ушбу материални ўзбекистонлик футбол ишқибозлари эътиборига ҳавола этишни маъқул топди.

- Аббос Россияда ўзбек ва Марказий Осиё футболининг тарғиботига жуда катта ҳисса қўшганини алоҳида таъкидлашни истайман.

Албатта, Шомуродов ҳам “Ростов”да муваффақиятли ўйнаган. Лекин Файзуллаев москвалик мухлисларни шундай ўзига мафтун қилиб қўйди. Мамлакатда энг катта фан-базага эга клублар айнан Москвада жойлашган.

“Армиячилар”нинг фанатлари Аббосни қандай изоҳлар ва фикр-мулоҳазалар билан кутиб олишганини яхши эслайман. Энди уни қандай илиқлик билан кузатиб қўйишаётганига ҳам гувоҳ бўлиб турибмиз.

Файзуллаев москваликларнинг аксариятида кейинги йилларда Марказий Осиё футболчилари тўғрисида шаклланган стереотипларни синдириб ташлади. Бу жуда муҳим омил.

Аббоснинг кўнгли очиқлиги ва меҳрибонлиги, шунингдек, жамоадошлари палов тортиб, қилган меҳмондўстлиги жоимо хотираларда қолади. Файзуллаевни ҳар доим ўз қадрдонларидек қабул қилишларига аминман, - деб ёзди Александр Троицкий.

Аббосбек Файзуллаев ЦСКАдаги икки йиллик фаолияти давомида Россия Премьер-лигасининг бронза медали, мамлакат кубоги ва Суперкубоги соҳиби бўлди.

21 ёшли ҳужумкор футболчимиз “армиячилар” сафида барча турнирларда 72 та учрашувда иштирок этиб, рақиблар дарвозасини саккиз маротаба ишғол қилди ва жамоадошларига 22 та голли пас узатди.

Шунингдек, Аббосбек Файзуллаев Ўзбекистон миллий терма жамоасининг ўз тарихида илк бор жаҳон чемпионатига йўлланма олишига муносиб ҳисса қўшди. Икки йилдан буён халқаро миқёсдаги баҳсларда 27 та ўйин ўтказиб, ўз ҳисобига саккизта гол ёздириб қўйди.

Ҳусанов “Манчестер Сити” қароридан ранжийди, лекин...

Тезкор: Файзуллаев ЦСКАдан кетди, кейинги манзил аниқ

Ўзбек футболчиси Лондоннинг энг қадимий клуби билан шартнома тузди

Файзуллаев бирорта ўзбек футболчиси эришмаган натижани қайд этди

Файзуллаев бразилияликларнинг “жаҳли”ни чиқарди!