Файзуллаев Роналду видео мурожаат йўллаганини тасдиқлади
- 15-июн, 08:37
- Zohir Toshxo’jayev
- 0
- Футбол
Ўзбекистон миллий терма жамоаси ҳужумкор футболчиси Аббосбек Файзуллаев “Спорт-Экспресс” нашрига берган интервьюсида “Жаҳон чемпионати-2026”да Португалияга қарши ўйин ҳақидаги фикрлари билан ўртоқлашди.
— Сизнингча, Португалия терма жамоаси ҳозир Криштиану Роналду билан кучлими ёки усиз?
— Балки прессинг нуқтаи назаридан Роналдусиз кучлироқдир. Аммо Криштиану майдонда бўлганда жамоага ишонч бағишлайди. У исталган вақтда ўйин тақдирини ҳал қилиши мумкин.
Криштиану футбол тарихидаги энг буюк футболчилардан бири ва ҳали ҳам майдонда ҳал қилувчи роль ўйнай олишига шубҳа йўқ.
— Унга қарши майдонга тушиш лаҳзасини кутяпсизми?
— Албатта, жуда-жуда интизорлик билан кутяпман. Телевизор орқали унинг ўйинларини томоша қиларканман, ҳар доим шуни орзу қилганман.
Мен ўзим Лионель Мессининг мухлисиман, аммо Криштиану ҳам менга жуда ёқади. Унга қарши ўйнаш — албатта, катта орзу.
— Эсимда, Роналду “Ан-Наср”да Жалолиддин Машарипов билан бирга ўйнаганида ўзбек халқига видео мурожаат ҳам йўллаган эди.
— Ҳа-ҳа, албатта. Бу ижтимоий тармоқларда жуда машҳур бўлиб кетганди.
Бизнинг акамиз Машарипов у билан бир жамоада ўйнади, кўп нарсаларни ўрганди. Криштиану ҳам унга турли маслаҳатлар ва тажрибаларини улашган.
Машғулотлар охирида улар зарба бериш бўйича мусобақалашишарди.
— Хўш, ким ғолиб бўлган?
— Бунисини айтмайман, ха-ха!
Ўзбекистон миллий терма жамоаси Португалияга қарши учрашувини 23 июнь куни ўтказади. Баҳс Тошкент вақти билан соат 22:00 да бошланади.