Файзуллаев энг зўр ўйинини Суперфиналда кўрсатади!
- 15-май 2025, 17:00
- Zohir Toshxo’jayev
- 0
- Футбол
2023 йилнинг ёзида “Пахтакор”дан ЦСКАга кўчиб ўтган Аббосбек Файзуллаев легионер сифатида “армиячилар” сафида илк совринини қўлга киритиши мумкин.
Таниқли мураббий Марко Николич ўтган йил охирида ЦСКАни қабул қилиб олганидан кейин, қишки танаффус пайтида жамоа ўйинини ўзгартирди. “Армиячилар” сербиялик мутахассис қўл остида “ромб” усулини қўллай бошлади.
Янги схемада асосий оғирлик Аббосбек Файзуллаевга тушяпти. Чунки қанот ҳужумчиси ҳисобланган ҳамюртимиз энди майдон марказида ҳам ҳужум ташкил қилиш, ҳам ҳимояга ёрдам бериш вазифасини бажармоқда. Марко Николич ромб ўйин услубидаги энг мураккаб позицияга айнан ўзбек футболчисини қўйганини ўтказилган тестлар натижасида Файзуллаев энг чидамли ўйинчи бўлиб чиққани билан изоҳлади.
Ўзгаришлар самара келтира бошлади. Мавсумнинг биринчи қисмини олтинчи ўринда якунлаган ЦСКА ўнта учрашувдан бери давом этиб келаётган мағлубиятсиз сериясидан кейин кучли учликка қўшилди. Чемпионатда “армиячилар” мартдан бери еттита ғалаба ва учта дуранг қайд этди.
Аббосбек Файзуллаев жамоаси Россия кубогида ҳам жасорат кўрсатди. Суперфинал йўлланмаси учун курашда амалдаги чемпион ва кубок соҳиби – “Зенит”га дуч келган пойтахтликлар биринчи учрашувда 0:2 ҳисобида ютқазганди. Бироқ жавоб ўйинида ҳудди шу ҳисобда зафар қучди.
Ғолибни аниқлаш учун ўтказилган пенальтилар сериясида питерликлардан устун келган ЦСКА Россия кубоги Суперфиналига чиқди.
“Зенит” билан бўлиб ўтган учрашувдан кейин Аббосбек Файзуллаев журналистларнинг саволига лўнда қилиб жавоб берди.
Савол-жавоб қуйидагича бўлди:
— Кўпчилик “Зенит”га қарши жавоб учрашуви ЦСКАнинг мавсумдаги энг зўр ўйини бўлди, деяпти. Бу фикрга қўшиласанми?
— Ҳа қўшиламан. Лекин мавсумдаги энг зўр ўйинимиз ҳали Суперфиналда бўлади. Бу муҳитни тавсифлашга тил ожиз.
Мен бизни охиригача қўллаб-қувватлаб келаётган ва ишонч билдираётган мухлисларга миннатдорлик билдирмоқчиман. Биз ўтган ўйиндан олдин ҳам ўзимизга ва ғолиб чиқа олишимизга ишонгандик.
Таъкидлаш жоизки, Аббосбек Файзуллаев жорий мавсумда Россия Премьер-лигаси ва мамлакат кубоги доирасида 36 та учрашувда иштирок этиб, ўз ҳисобига учта гол ва еттита ассист ёздириб қўйди.
21 ёшли легионеримиз янги позицияга ўтказилганидан кейин унинг самарадорлигида пасайиш кузатилмоқда. Бироқ сербиялик мутахассис Марко Николич бу вақтинчалик ҳолат эканини, Аббос янги амплуага тўлиқ мослашиб олганидан кейин голлари ва ассистлари сони сезиларли даражада ошишини билдирган эди.
Россия кубоги Суперфинал ўйини 1 июнь куни Москвадаги “Лужники” стадионида бўлиб ўтади. Ҳал қилувчи баҳсда ЦСКА футболчилари “Ростов” жамоаси билан куч синашади.
Англия кубоги финали олдидан Ҳусанов мухлисларига хушхабар!
Бу юлдуз келса, Ҳусановга “Сити”да аниқ “нон” қолмайди!