Файзуллаев бўлмаганида аҳвол яна ҳам оғирлашарди!
- 18-декабр 2023, 18:18
- Zohir Toshxo’jayev
- 1
- Футбол
Россия Премьер-лигасида қишки танаффус эълон қилинган. Мутахассислар чемпионатнинг биринчи қисмини таҳлил қилмоқда. Уларнинг аксарияти Аббосбек Файзуллаевнинг ЦСКАга трансферини муваффқиятли чиққанига эътибор қаратяпти.
Sports.uz портали ўзбекистонлик футбол ишқибозлари эътиборига россиялик экспертларнинг Аббосбек Файзуллаев ҳақидаги фикрларини ҳавола қилишни давом эттиради.
Владимир Пономарев, ЦСКАнинг собиқ футболчиси:
Агар қоғозга қараб баҳо берадиган бўлса, мусобақа жадвалидаги саккизинчи ўрни ЦСКА учун жуда фожиали натижа.
Амалда эса, Владимир Фёдотов жамоаси кучли учликка кириш учун курашиш имкониятига эга. Чунки пешқадамлар билан очколар орасидаги фарқ унчалик катта эмас. Хавотирли жиҳати захира ўриндиғининг калталигидир. Ҳар бир учрашувда бир хил таркиб ўйнаяпти, ўйинчи алмаштириш ҳам минимум даражада.
Аббосбек Файзуллаев келиши билан порлай бошлагани ЦСКАнинг омади. Ҳар қандай ёш ўйинчига ҳам келибоқ, клубнинг энг яхши ўйинчилар қаторига ёриб кириш насиб қилавермайди. Аббосбек буни уддалади.
Агар Аббосбек Файзуллаев бўлмаганида жамоанинг мусобақа жадвалидаги аҳволи бундан ҳам баттар бўларди.
Андрей Канчельскис, “Манчестер Юнайтед” собиқ футболчиси, “Навбаҳор”нинг собиқ бош мураббийи:
Чемпионатнинг биринчи қисмида шов-шувли сенсациялар бўлгани йўқ. “Зенит” кутилганидан бўшроқ ўйнади, “Краснодар” эса, сал яхшироқ ўйин кўрсатди. “Спартак” мухлисларини ўргатиб қўйганидек кетмоқда, ёрқин старт ва уёғига пасайиш.
Лигада қатнашаётган футболчилардан эътиборимни Аббосбек Файзуллаев тортди. У Россия Премьер-лигасида порлаяпти. Шунинг учун ҳам айнан ўзбек легионерини чемпионатнинг биринчи қисми кашфиёти, деб аташимиз мумкин.
Олег Иванов, Россия терма жамоаси собиқ футболчиси:
Лиганинг янги ўйинчиларидан менга Аббосбек Файзуллаев ҳам ёқди. Жуда қизиқарли ўйинчи экан. Унга озгина жисмоний қувват етишмаяпти, мушакларини чиниқтириш ва ўстириш устида ишлаши керак.
Лекин ақлли футболчи экан, тўп билан зўр ишлаяпти, ҳар доим ҳужумни кучайтиришга эътибор қаратяпти.
Россия Премьер-лигасининг энг асосий кашфиёти сифатида айнан Аббосбек Файзуллаевни танлаш керак.
Евгений Алдонин, ЦСКАнинг собиқ футболчиси:
Менда энг катта таассурот қолдирган ўйинчи Аббосбек Файзуллаев бўлди. Ҳозир фақатгина ЦСКА миқёсида гапирмаяпман, балки бутун чемпионатни назарда тутяпман. Жисмоний кўрсаткичлари бироз камтарроқ бўлишига қарамай, техникаси ҳайратланарли даражада зўр.
Аббосбек Файзуллаев август ойида “Пахтакор”дан ЦСКАга 500 минг евро эвазига кўчиб ўтганди. Тўрт ой ичида унинг трансфер суммаси бир неча баравар ошиб, айни пайтда 4 миллион еврога етди.