Фарҳод Нишонов: "Жамоам ўз ўйинини кўрсатганидан хурсанд бўлдим"

Ўзбекистон кубоги 1-тур доирасидаги “Олимпик-MobiUz” — “Машъал” ўйинидан сўнг (3:1) мезбонлар бош мураббийи Фарҳод Нишонов ўз фикрларини билдирди.

– Дастлабки ўйин ҳақида ва умуман кубокдаги старт ҳақида фикрингизни билдирсангиз.

– Бугун кубок ўйинларини яхши бошладик. Йигитлар ўйинни жуда яхши бошлашди, гол урдик. Ундан кейинги вазиятларда ҳам яхши ҳаракат қилдик. Камчиликларимиз бор, хатоларимиз бор. Энг муҳим эпизодлар бор, уларни яхшилашимиз керак. Бу бўйича ишлаяпмиз. Лекин бугунги ўйиндан кўнглим тўлди, чунки йигитлар яхши ҳаракат қилишди ва мен ўйлайманки, ҳақли равишда ғалаба қозондик.

– Жамоанинг кўрсатган ўйини – бу сизнинг кўрсатмангизнинг майдондаги амалий рўёбими ёки рақиб жамоа жуда пассив ўйин кўрсатдими?

– Рақибга ҳурмат қилиб гапираман, чунки рақиб барибир "Машъал" – яхши жамоа. Суперлигада ўйинлари омадсиз бошланди. Бу ҳамма жамоада бўладиган нарса, деб ўйлайман. Чунки охирги ўйинларига қарасангиз, "Динамо" билан ўйинда, "Бухоро" билан ўйинда ёмон ҳаракат қилмаган, тенгма-тенг кураш олиб борган. Мен бугун хурсанд бўлдим, жамоам ўз ўйинини кўрсатди. Биз улардан нимани талаб қилган бўлсак, бугун ўша нарсани кўрдим. Бу ғалабанинг энг катта сабаби, менимча, бу – ишонч. Ўзларига ишонди, ўзларининг футболини кўрсатди, шунинг ҳисобига ғалаба қозондик.

– Умуман олганда, "Олимпик Мобиуз"ни кубок ўйинларида Суперлига жамоаларига қарши қандай тайёрлаяпсиз?

– Ҳар доимгидек тайёргарлик кўрамиз, чунки биз ҳар бир рақибга қарши алоҳида тайёрланишимиз керак. Бу жамоани эсдан чиқармаслик керак, барибир масъулияти бор. Олдимизга жуда катта вазифалар қўйилган. Шунинг учун биз ҳар бир рақибга жиддий тайёргарлик кўрамиз.