Фабрегас А Серияда сенсация кўтарди

Испаниялик машҳур футболчи Сеск Фабрегас мураббийлик фаолиятида ҳам дастлабки катта натижасини қўлга киритди.

Ҳали Италия футболида катта ютуқларни қўлга киритмаган камтаргина “Комо” жамоасини бошқарган Фабрегас қисқа фурсатда шогирдларини Европа Чемпионлар лигасига олиб чиқди.

Еврокубоклар йўлланмаси учун кураш сўнгги турда ечим топди. “Комо” А Серия 38-турида “Кремонезе”ни 4:1 ҳисобида мағлуб этди ва клуб тарихида биринчи марта Чемпионлар лигаси йўлланмасини қўлга киритди.

Тўртинчи учун курашда “Комо”га рақиблик қилган жамоаларнинг очко йўқотиши Сеск Фабрегаснинг чемпионатни шов-шувли натижа билан якунлашини таъминлади. Хусусан, “Милан” ўз уйида мағлубиятга учраган бўлса, “Ювентус” сафарда икки очко йўқотди ва ҳар икки жамоа Чемпионлар лигасидан қуруқ қолиб, Европа лигасида ўйнайдиган бўлди.

Сеск Фабрегас жамоани 2024 йилнинг ёзида қабул қилиб олган эди. Ўтган мавсумда бош мураббий сифатида дебют қилган мураббий шогирдоари А Серияда 10-ўринни эгаллаганди. Фабрегас яқинда қуйи лигада ўйнаб юрган жамоани икки йил ичида қитъанинг энг нуфузли турнирига олиб чиқди.