Европага кетадиган вундеркиндлар энди терма жамоада ўйнамайди

Аргентина футбол ассоциацияси (AFA) мамлакат терма жамоаларга футболчиларни чақириш қоидаларини ўзгартирадиган қарор қабул қилди. Энди 18 ёшга тўлмасдан мамлакатни тарк этиб, хорижий клублар билан шартнома имзолаган футболчилар Аргентина терма жамоасига ҳеч қайси даражада чақирилмайди.

Бу чора-тадбирлар маҳаллий клубларни ёш иқтидорларни Европа жамоалари томонидан арзимаган сумма эвазига олиб кетилишидан ҳимоя қилишга қаратилган.

Бу ҳақда The Athletic хабар бермоқда.

Манба маълумотига кўра, AFA patria potestad (ота-оналик ҳуқуқи) деб аталувчи юридик бўшлиқни ёпишга интилмоқда. Аргентина қонунчилигига мувофиқ, вояга етмагунга қадар боланинг қаерда яшаши ва фаолият юритиши ҳақида қарорни ота-оналар қабул қилади. Бу эса оилаларга иқтидорли ўсмирларни Европага олиб кетиб, у ерда профессионал шартнома имзолаш имконини беради, натижада Аргентина клублари тайёрлов учун фақат рамзий компенсация билан чекланиб қолади.

Агар мазкур қоида аввалроқ жорий этилганида, эҳтимол дунё Лионель Мессини Аргентина терма жамоаси сафида ҳеч қачон кўрмас эди. Терма жамоа сардори 13 ёшида “Ньюэллс Олд Бойз”ни тарк этиб, худди шу схема асосида “Барселона” билан шартнома имзолаган эди.

Энди эса федерация ёш футболчилар олдига аниқ танлов қўяпти: Аргентинада илк профессионал шартномани имзолаш ёки халқаро майдонда мамлакат шарафини ҳимоя қилиш имкониятидан воз кечиш.

Яқинда “Ривер Плейт” ёшлар жамоасининг 16 ёшли сардори Лукас Скарлато Италиянинг “Парма” клубига ўтгани AFA учун сабр косасини тўлдирган сўнгги ҳолат бўлди. Энди бунақа трансферлар агентлар ва оилалар қарорига кўра, Европага эрта олиб кетилган футболчилар учун халқаро миқёсда фаолият олиб бориш имкониятидан маҳрум қилади.