Европа суперклуби Ҳусанов трансфери бўйича иш бошлади. Январда янгилик бўладими?
- 27-ноябр 2024, 21:45
- Zohir Toshxo’jayev
- 3
- Футбол
Ўзбек футболчилари орасида Абдуқодир Ҳусанов фаолиятида ўзгариш бўлиши эътимоли ошиб бормоқда. “Ланс”да ўйнаётган ҳимоячига Европанинг бир неча клублари кўз тикмоқда. Аксарият манбалар ПСЖ раҳбарияти легионеримиз трансфери бўйича иш бошлагани ҳақида маълумотлар чиқара бошлади.
Sports.uz портали ўзбекистонлик футбол ишқибозлари эътиборига Европа нашрлари ва футбол экспертларининг Ҳусанов келажагиги оид ахборотларини ҳавола этади.
Ив-Алекс М'Пара, football365.fr сайти эксперти:
ПСЖ “Ланс” эшигини қоқмоқчи. Парижликлар қишки трансферлар даврида фаоллик кўрсатишни мақсад қилган. Пойтахт клуби бир неча йўналишларда таркибни ислоҳ қилишга бел боғлаган.
“Пари Сен-Жермен” нафақат ҳужум чизиғи, балки ҳимояга ҳам ўйинчи олишни режалаштирмоқда. Улар “Ланс”нинг 20 ёшли футболчиси Абдуқодир Ҳусановни нишонга олган.
Ҳақиқатан, истеъдодли легионер ПСЖ мутасаддилари эътиборини тортди. У Ўзбекистон миллий терма жамоасида ҳам, “Ланс”да ҳам асосий устунлардан бирига айланган.
ПСЖ спорт директори Луиш Кампуш бу трансферни январда амалга ошириш учун ўзбек футболчисининг манфаатларини ҳимоя қилаётган мутасаддилар билан учрашиб, ҳамкорлик масалаларини муҳокама қилишга киришди.
Париж клуби бош мураббийи Луис Энрикега Ҳусановнинг бироз қўпол, лекин жуда шиддатли ва чекинмайдиган ўйин услуби жуда маъқул келмоқда. Бу трансфер орқали Абдуқодир жамоа сардори Маркиньосга ўринбосар бўлиши мумкин.
Transfermarkt портали экспертлари Ҳусановни 5 миллион еврога баҳоланган, лекин “Ланс” ўзининг етакчи ҳимоячиси учун бундан анча катта сумма талаб қилади.
Ҳусановнинг “Ланс” билан ҳамкорлиги 2027 йилнинг июнигача давом этиши белгиланган. Кўп нарсани лансликлар бош мураббийи Уилл Стиллнинг ўйинчи трансфер бўйича қандай қарорга келиши ҳал қилади.
Кевин Каррьер, dailymercato.com портали муҳаррири:
Абуқодир Ҳусанов – Франция чемпионати кашфиётларидан бири сифатида ПСЖ ва Луиш Кампуш назарига тушди.
20 ёш бўлишига қарамай, катта истеъдод ва салоҳият эгаси эканини намойиш қилиб қўйди. Уни Европанинг бир неча клублари кузатиб келмоқда. Францияда парижликлардан ташқари “Марсель” ҳам Ҳусановни ўз сафида кўрмоқчи.
Луиш Кампуш ҳамкорлик масаласида ўзбек футболчисининг агентлари билан учрашган. Бироқ ҳали пойтахт суперклубидан аниқ таклиф бўлгани йўқ.
Лекин ПСЖ январда марказий ҳимоячи олишни режалаштирган. Ҳусанов 20 миллион еврога баҳоланмоқда. “Ланс” йил бошида молиявий фэйр-плейни таъминлаш учун 40 миллион евро топиши талаб этилади. Улар бу масалани биргина Ҳусанов трансфери билан ёпишга уриниб кўради.
Микаэль Руфет, allezparis.fr журналисти:
ПСЖнинг тажрибали ҳимоячиси Милан Шкриньяр “Ювентус” билан келишувга эришди ва январда Италия чемпионатига қайтиб кетиши кутилмоқда. Пойтахтликлар унга ўринбосар ҳам топиб қўйди.
Парижликларга ўнақай ҳимоячи керак ва улар Абдуқодир Ҳусановни олишни истаяпти. Луиш Кампуш трансфер маълумотларини сўраб, “Ланс”даги ҳамкасбларига мурожаат қилди.
Лансликлар асосий ҳимоячисини январда қўйиб юбориши қийин масала. Агар бу трансферни тез орада уддалашнинг имкони топилмаса, ПСЖ бу ишни мавсум якунланганидан кейин давом эттиради.
Патрик Чанхун, goal.com портали эксперти:
Қишки трансферлар ойнаси ҳали очилгани йўқ, лекин ПСЖ ўзига керакли ўйинчилар рўйхатини тузиб олди. Парижликлар кўп гол ўтказаётгани боис, Европа Чемпионлар лигасида ҳам муаммоларга дуч келмоқда.
Уларга Матвей Сафонов ва Жанлуижи Доннаруммага дарвозаси дахлсизлигини сақлашда ёрдам бера оладиган марказий ҳимоячи керак.
Бу борада пойтахтликларга 20 ёшли ўзбек ҳимоячиси Абдуқодир Ҳусанов номзоди жуда ёқиб турибди. Чунки ПСЖ нишонида турган яна бир номзод – Томас Араухони олишда етарлича муаммолар бор. “Бенфика” қатор гранд клублар назарига тушган ҳимоячисини сотиб юборишга шошилмайди ва максимал даражада даромад олиш учун бу масалани ёзда ҳал қиладиган бўлди.
Ҳурматли мухлислар, сиз нима деб ўйлайсиз, Абдуқодир Ҳусанов фаолиятини қайси лига ва қайси жамоада давом эттиргани маъқул? Фикрларингизни билдиринг...