Еврокубоклар учун ўзбек ҳужумчисини олинг!
- 25-июн 2025, 21:01
- Zohir Toshxo’jayev
- 0
- Футбол
Ўзбекистон миллий терма жамоаси аъзоларидан ҳисобланган машҳур ҳужумчи Бобур Абдухолиқов фаолиятида яна ўзгариш бўлиши кутилмоқда.
28 ёшли қашқадарёлик форвард мавсумни Озарбайжон чемпионати вакили “Сумгайит” жамоасида якунлади.
Бу клуб икки нафар ўзбекистонлик легионер – Бобур Абдухолиқов ва Жасур Жалолиддиновнинг жамоани тарк этганини расман эълон қилди.
Россиялик журналист Александр Троицкий ўзбек футболчиларининг Озарбайжон чемпионатини тарк этганига муносабат билдирди.
- “Сумгайит” Жасур Жалолиддинов ҳамда Бобур Абдухолиқов билан хайрлашди. Ҳар икки футболчининг клуб билан шартномаси якунланди.
Жасурнинг масаласи борасида ҳаммаси тушунарли эди. Бу жамоада унинг ўйини қовушмади ва у “Сўғдиёна” машғулотларида кўриниш берган эди.
Бироқ Бобур Абдухолиқовга клуб янги битим таклиф қилиши кутилганди. Ўзбекистонлик форвард ҳар ҳолда 13 та учрашувда тўртта гол ва учта ассист қайд этди. Бу клубдаги иккинчи кўрсаткич. Исроиллик Рой Кехат жами 34 та ўйинда олтита тўп киритиб, иккита голли пас узатган.
Абдухолиқов Қозоғистон чемпионатида пайдо бўлиб қолса, умуман ҳайрон бўлмайман. Масалан, Еврокубоклар олдидан “Ордабаси”га қайтиши мумкин, - деб ёзди Александр Троицкий.
Таъкидлаш жоизки, Бобур “Ордабаси” учун бегона эмас. Легионеримиз 2023 йили бу чимкентликлар сафида ўйнаб, 36 та учрашувда рақиблар дарвозасини саккиз бор ишғол қилган.
Бундан ташқари, Адухолиқов Ўзбекистон Суперлигасида “Насаф” ҳамда Беларусь олий лигасида “Энергетик-БГУ” жамоалари шарафини ҳам ҳимоя қилган. Айниқса, Беларусдаги фаолияти муваффақиятли чиқиб, 26 та гол билан чемпионатнинг энг зўр тўпурари бўлган. Гол+пас тизимида 32 балл (26 та гол + 6 та ассист) кўрсаткич билан лиганинг энг самарадор ўйинчиси бўлган.
Бобур Абдухолиқов Беларусь чемпионатида иккита рекордни янгилаб, учта янги рекорд қайд этишга муваффақ бўлган.
Айни пайтда тажрибали ҳужумчи ўзига янги жамоа топиши талаб этилади. Қозоғистон чемпионатида ўйнаган даврда ўзидан яхши таассурот қолдирган Бобур яна қўшни чемпионатга қайтиши мумкин. Чунки “Ордабаси” УЕФАнинг учинчи мусобақаси – Конфренциялар лигасида иштирок этиши керак. Бу жамоага Европа футболидан хабардор тўпурар ҳужумчи ортиқчалик қилмайди, албатта.
Бобур Абдухолиқов учун олдиндаги мавсум жуда муҳим аҳамият касб этади. Чунки у 2026 йилги жаҳон чемпионатига йўлланма олган миллий терма жамоага номзод футболчи ҳисобланади. Мундиалга борадиган таркибга кириши учун Абдухолиқов янги мавсумда мунтазам ўйин амалиётига эга бўлиши ва ўйинларда тўпурарлик қобилиятини намойиш қилиши шарт.
Абдухолиқов ҳозиргача Ўзбекистон терма жамоаси сафида халқаро миқёсда 18 та учрашув ўтказиб, ўз ҳисобига битта гол ёздириб қўйган.
Тезкор: Европа клуби Файзуллаев трансферига оид расмий маълумот чиқарди