Эстеваонинг агенти: "Барса" ҳар йили қизиқди, лекин молия йўл қўймади"
- 26-ноябр 2025, 23:59
- Bilolbek Imomov
- 0
- Футбол
"Челси"нинг ҳужумкор футболчиси Эстевао билан ишлайдиган агент Андре Кьюри унинг "Барселона" билан бўлган алоқалари ҳақида гапирди.
Унинг айтишича, каталонияликлар футболчига бир неча йил давомида қизиқиш билдирган, бироқ молиявий муаммолар туфайли трансферни амалга ошира олмаган.
Кьюрининг гаплари қуйидагича:
"Биз "Барселона" билан Эстевао борасида 2021, 2022, 2023 ва 2024 йилларда гаплашганмиз. Биз офисларига бориб, футболчини таклиф қилганмиз, чунки у жаҳон футболида катта келажакка эга бўлишини билардим.
Аммо "Барселона" молиявий жиҳатдан барқарор эмас эди, шунинг учун битимни амалга ошириш имкони бўлмаган. Бу аламли, лекин футбол шундай. "Барса"нинг техник штабдаги инсонлари ҳар доим Эстеваони олишни маъқуллашган, лекин Деку молиявий чекловлар туфайли қўлидан ҳеч нарса келмаган", — деди Кьюри "Cadena SER"га.
Эслатиб ўтамиз, сешанба куни "Челси" Чемпионлар лигасида "Барселона"ни 3:0 ҳисобида мағлуб этди. Эстевао ушбу учрашувда голлардан бирини урди.