Эртами, кечми ким ҳақиқий чемпионлигини аниқлаймиз! Баҳодир Жалолов янги жаҳон чемпионига "вызов" ташлади
- 1-сентябр, 10:35
- Zohir Toshxo’jayev
- 0
- Бокс
Ўзбекистонлик супер оғир вазнли боксчи Баҳодир Жалолов (17-0, 15 КО) ўз вазн тоифасида IBF версияси бўйича янги жаҳон чемпиони бўлган хорватиялик Филип Хрговичга (21-1, 16 КО) мурожаат қилди.
29 август куни Лондонда бўлиб ўтган жангда Хргович маҳаллий ареналарнинг ёрқин вакилларидан бири саналган Мозес Итаумуни (14-1, 12 КО) техник нокаут эвазига мағлуб этиб, бўш турган чемпионлик камарини қўлга киритди.
Бу натижа экспертлар томонидан кутилмаган бурилиш сифатида баҳоланди.
Баҳодир Жалолов хорватиялик боксчининг жангини юқори баҳолар экан, бир вақтнинг ўзида келгусида у билан рингда тўқнашишга тайёр эканини ҳам билдирди.
- Филип Хргович, ғалабанг билан табриклайман! Сен ажойиб ирода кўрсатдинг ва ҳақиқий жангчи эканингни исботладинг. Сени чемпион сифатида ҳурмат қиламан.
Лекин барибир эрта ёки кеч йўлларимиз кесишади. Ўша кун келганда, ким ҳақиқий чемпион эканини аниқлаймиз, — деб ёзди «Катта ўзбек» лақаби билан машҳур бўлган Жалолов ўзининг ижтимоий тармоқдаги саҳифасида.
Баҳодир Жалоловнинг сўнгги жанги жорий йил 9 май куни Англиянинг Манчестер шаҳрида ўтган эди. Ўша баҳсда у яна бир хорватиялик рақиб — Агрон Смакичини (21-4, 9 КО) муддатидан олдин мағлуб этган.