Энди бутунлай бошқа “Тоттенхэм”ни кўрасизлар!

“Тоттенхэм” ҳимоячиси Микки ван де Вен янги мавсумда жамоа мутлақо бошқача қиёфада бўлишига ишонч билдирди.

Роберто Де Дзерби ўтган мавсум охирида жамоа бошқарувини қабул қилиб олган ва фақат сўнгги турдагина клубни Премьер-лигада сақлаб қолиш вазифасини бажарган эди. Шундан кейин у таркибни қайта қуришга киришди.

Бу ёзда “Тоттенхэм” олтита янги футболчи билан шартнома тузди. Ван де Веннинг фикрича, янги мавсумда жамоа нафақат таркиби, балки ўйин услуби жиҳатидан ҳам тубдан ўзгаради.

- Мен буни аниқ биламан. Бу ўтган мавсумги мураббийимиз давридагидан бутунлай бошқача “Тоттенхэм” бўлади. Биз тўпга кўпроқ эгалик қиламиз, кўпроқ комбинацион футбол ўйнаймиз. Бу мухлислар учун ҳам томошабоп бўлади.

Ўтган мавсумнинг охирги икки ҳафтасидаёқ у жамоага қанчалик катта иштиёқ олиб кирганини кўрдингиз. Биз характер ва руҳият жиҳатидан анча ўсдик. Бу бизга жуда керак эди.

У тўп билан кўпроқ ўйнашни яхши кўради. Мен ҳам шундай футболдан завқ оламан.

Умид қиламанки, янги мавсум яхшироқ ўтади. Бунинг учун қаттиқ меҳнат қиламиз. Чунки ўтган мавсумни қабул қилиб бўлмайди, - деди ван де Вен.