Элдор Сакаев: "Йигитлар айбдор деб ўйламайман, бу мураббийнинг айби"

Суперлигада қаторига 11 турдан бери фақат мағлубиятга учраб келаётган "Машъал" Ўзбекистон Кубогини ҳам мағлубият билан бошлади. 1-тур доирасида про лига вакили “Олимпик-MobiUz”га қарши баҳсда 2:1 ҳисоби қайд этилди.

"Машъал" матбуот хизмати ўйиндан кейин жамоа устози Илдар Сакаевнинг матбуот анжуманидаги фикрларини ҳавола қилди.

– Ўйин ҳақида фикрингиз?

– Ўйин ҳақида нима дейишим мумкин... Яна мағлубиятга учрадик – 1:3. Рақибни ғалаба билан табриклайман. Биз эса... Мен ҳар доим айтаман: мураббий ютқазади. Барча айбни ўз бўйнимга оламан, бу менинг айбим. Икки ҳафтадан бери ишлаяпман, демак, бу менинг камчилигим, менинг хатом. Нега ундай бўлди ва ҳоказо – ҳаммасига фақат шундай қарайман. Йигитлар ўз имкониятлари даражасида ўйнашмоқда, демак, мен уларни етарлича тайёрлай олмаганман. Бу менинг айбим. Кимдир ҳаракат қилмади, деб айтиш ноўрин. Яна қайтараман, улар қўлларидан келганича ўйнашмоқда. Шу сабабли мен жамоани ўйинга тайёрлаш учун зарур бўлган мувозанатни топа олмадим. Икки ҳафта – бу мен уддалай олмаган муддат."

– Натижадан келиб чиқиб сўрамоқчиман, ҳозир инқироз ҳолати кузатилмоқда, ғалабалар йўқ, кетма-кет мағлубиятлар қайд этиляпти. Умуман олганда, жамоа бу ҳолатдан қандай чиқиб кетиши мумкин? Ёки футболчиларнинг руҳияти аллақачон тушиб бўлганми? Хуллас, жамоа бу инқироздан қандай қутулиши мумкин?

– Инқироз... Ҳар қандай бош берк кўчадан чиқиш йўли бор, шундай эмасми? Ўшанда ҳам айтгандим: фақат заифларгина таслим бўлади. Охиригача курашиш, бу вазиятдан чиқиб кетиш керак. Боя кийиниш хонасида ҳам йигитларга айтдим... Албатта, ўзгаришлар керак, улар бўлиши ҳам шарт, лекин вазиятдан ўнгланишимиз лозим. Қанақасига таслим бўламиз? Спорт тамойили қаерда қолди? Охиригача курашиш керак. Яна таъкидлайман, бу мураккаб вазиятдан чиқиш йўлини топиш зарур. Бу ҳолатга ўзимиз тушиб қолдикми, демак, чиқиш йўлини ҳам ўзимиз топишимиз керак. Таслим бўлиш мумкин эмас.

– Худдики жамоа ҳеч кимга керак бўлмай қолгандек...

– Йўқ, нега ундай дейсиз? Унақа эмас. Бу ерда ҳамма тузатиши керак бўлган хато бор. Энди қўлни кўтариб таслим бўлиш... Ундай қилиш мумкин эмас. Яъни, охиригача ҳаракат қилиш керак.

– Ўйин мобайнида рақибга нисбатан зарбалар кўрсаткичи кам бўлди. Бунга асосий сабаб сифатида нимани кўрсатасиз? Рақиб прессингда яхши ўйнадими ёки футболчиларнинг маҳорати етишмадими?

– Ўзингиз кўрдингиз, биз уларнинг прессингда ўйнашини билардик ва буни таҳлил қилгандик. Прессингдан қандай чиқиб кетиш кераклигини билардик, ўзимиз ҳам контрпрессинг қилмоқчи эдик. Бундай вазиятлар ҳам бўлди. Кейин эса хатолар... Ўйин охирида умуман кераксиз гол ўтказиб юбордик. Охирида эса... албатта, зарба бўлмаса, қанақасига гол бўлади? Ҳатто яримталик вазиятлар ҳам бўлди, лекин гол ура олмадик. Демак, мен охиригача ишламаганман. Фақат шундай. Йигитлар айбдор деб ўйламайман, бу мураббийнинг айби. Менинг айбим. Демак, шундай.