Дзюдо терма жамоамиз "Катта Дубулға" турнирида олтинчи ўринни эгаллади

Швейцариянинг Лозанна шаҳри мезбонлик қилган "Катта Дубулға" туркумига кирувчи нуфузли турнир ўз якунига етди. 

Уч кунлик муросасиз беллашувлар якунига кўра Ўзбекистон терма жамоаси 1 та олтин, 2 та кумуш, 2 та бронза медали билан дунёнинг 77 давлати орасида ТОП-6 таликдан жой олди. Мусобақанинг сўнгги куни жамоамиз учун муваффақиятли келди. -90 кг вазн тоифасидаги беллашувлар дзюдочиларимиз бенефисига айланиб кетди. 

Умар Бозоров шарафига Швейцария заминида Ўзбекистон Республикаси давлат мадҳияси янгради. Бозоров фаолиятидаги учинчи "Grand Slam" медалини қўлга киритди. У шу кунгача "Tbilisi Grand Slam 2025" да олтин, "Ulanbator 2025" да кумуш медалга сазовор бўлган эди.

Олтин медал:
-90 кг: Умар Бозоров

Кумуш медаллар:
-81 кг: Арслонбек Тожиев
-90 кг: Нурбек Муртазоев

Бронза медаллар:
-60 кг: Самариддин Қўчқоров
-100 кг: Эрназар Сарсенбаев

Бу ҳақда Ўзбекистон дзюдо федерацияси матбуот хизмати хабар бермоқда.