Диёра Келдиёрова: Сўнгги 7 йил умуман дам олмадик

Дзюдо бўйича "Париж-2024" ёзги Олимпия ўйинлари чемпиони Диёра Келдиёрованинг тарихий ғалабаси кўпчилик ёшлар, айниқса, ёш қизлар учун жуда катта мотивация бўлди, десак муболаға бўлмайди. Оламшумул чемпионлиги билан минглаб ҳамюртларимизда соғлом турмуш тарзига қизиқиш уйғота олган спортчимизга айрим саволлар билан юзландик.

– Сизни яна қачон татамида кўрамиз?

– Ҳозир жароҳатларимни даволаяпмиз. Шунинг учун, аниқ билмайман. Келгуси Олимпиадагача яна 4 йил вақтимиз бор. Шу сабабдан ҳам ҳозир озгина таътилдамиз. Ўтган Олимпиадада "Covid-19" пандемияси бўлгани учун "Париж-2024" цикли қисқароқ бўлди. Сўнгги 7 йил умуман дам олмадик, десам ҳам бўлади. Шу боис, ҳам ҳозир ҳордиқ чиқаряпман ва шу пайтгача безовта қилган барча жароҳатларимни тузатяпмиз.

– Янги Олимпиада циклида вазн тоифангизни ўзгартирасизми?

– Йўқ, ўзгартирмайман. Бундай режам йўқ.

– Ортингиздан дзюдога келаётган ёш қизлар сезиларли даражада кўпайиб кетаётганини Сиз ҳам сезаётгандирсиз. Буни ҳиссиётини улаша оласизми?

– Албатта, бундан жуда хурсандман. Тўғриси, дзюдога келаётган қизлар бунчалик кўпайишини кутмаган эдим. Ўзбекистонда аёллар спортини ривожланиши учун озгина бўлса ҳам ҳисса қўшган бўлсам, жудаям хурсандман. Бунинг ортидан опа-сингилларимиз соғлом турмуш тарзини танлашяпти. Соғлом онадан соғлом фарзанд дунёга келади. Бу, албатта, профессионал спортда ҳам “мева”сини кўрсатади. Бизда (аёллар дзюдосида) рақобат унчалик ҳам кучаймаган эди. Сабаби, аввал дзюдочи қизлар сони кам эди. Ўйлайманки, яқин даврда рақобатни бугунгидан ҳам кучайтирамиз. Ҳар бир вазнда етакчиликка даъвогарларни 10 тага етказиб олсак, бу аёллар дзюдосида жуда катта кўтарилиш бўлади.

Манба: Olympic uz