Даврон Файзиев: Ғалати хабар...

"Манчестер Сити", "Реал" ва "Милан" каби клубларда тўп тепган собиқ бразилиялик футболчига қамоқ жазоси тайинланди. 

Италия суди зўрлаш айби билан Робиньони 9 йилга озодликдан маҳрум қилди. 37 ёшли собиқ ҳужумчи аппеляция берди, бироқ мазкур шикоят рад этилди. Ҳукм қатъий. Воқеа 2013 йилда бўлиб ўтганди.

Ушбу ҳолатга таниқли шарҳловчи Даврон Файзиев телеграмдаги саҳифасида бу ғалати хабар эканлиги, Робиньо бир пайтлар бўлажак Пеле сифатида қаралгани борасида фикр билдирди.

- Ўтмишда Бразилия терма жамоаси, "Реал Мадрид", "Манчестер Сити", "Милан" каби клубларда кўплаб ютуқларга эришган Робиньо эсингиздадир. Унга Италия суди томонидан 9 йиллик қамоқ жазоси белгиланди.

Ҳужумчи 2013 йили альбаниялик аёлни зўрлаганликда айбдор, деб топилди. Ҳозирда Робиньо Бразилияда ва Италия томон унинг экстрадициясини талаб қилмоқда. Катта эҳтимол билан Бразилия буни амалга оширмаслиги кутилмоқда. У ҳолда италияликлар жазо ўша ернинг ўзида амалга оширилишини сўрайди.

Ҳаммаси жиддий. Бу жараён анчадан бери давом этмоқда. Робиньонинг апелляциялари рад қилинган. Уни бўлажак Пеле дейишарди, натижа эса… - дея фикр билдирди Даврон Файзиев.