Хориждан кўп таклиф олган Беҳруз Каримов нега “Лугано”ни танлаганини айтди

Ўзбекистон миллий терма жамоаси аъзоси Беҳруз Каримов “Лугано” таркибига қўшилганидан кейин қисқа фурсат ичида швейцарияликлар таркибида дебютини нишонлади.

Иқтидорли ҳимоячи УЕФА Конференциялар лигасида “Маккаби Тель-Авив” жамоасига қарши захирадан майдонга тушиб, жамоасининг кейинги босқичга ўтишига ҳисса қўшди.

Беҳруз Каримов “Лугано” клуби матбуот хизматига берган интервьюсида янги жамоага  мослашув жараёни, жаҳон чемпионатидаги тажрибаси ҳамда келгуси мақсадлари ҳақида тўхталиб ўтди.

- “Луганo” мен учун трамплин вазифасини ўтаб беради. Жамоада мени жуда илиқ кутиб олишди. Бу клуб сафига қўшилганимдан бахтиёрман ва ушбу саргузашт фаолиятимда муҳим роль ўйнашига ишонаман. Европа жамоаларида тўп суришни ёшлигимдан орзу қилардим, шу боис ҳозир мотивациям жуда юқори.

Жаҳон чемпионатидан кейин бизга кўплаб жамоалардан таклифлар тушди. Уларнинг барчасини кузатиб, ўрганиб чиқдик ва якунда айнан “Луганo” варианти кўпроқ маъқул келди. Шу сабабли ушбу жамоани танладим”, - дейди Беҳруз Каримов.

Ёш ҳимоячи Ўзбекистон миллий терма  жамоаси сафидаги Жаҳон чемпионати баҳслари унинг футболчи сифатида ўсишига қандай таъсир қилгани ҳақида ҳам гапириб ўтди.

- “Мундиалдаги иштирок мен учун улкан тажриба мактаби бўлди. Ўйин вақтида иложи борича дарвоза сари зарба беришга, ҳеч нарсадан қўрқмасликка ҳаракат қиламан. Агар ҳаяжонни енгиб, қўрқувсиз ўйнасам, барча имкониятларимни ишга сола оламан.

Асосий мақсадим – ўзимиз иштирок этадиган барча мусобақаларда юқори натижаларни қўлга киритиш. Майдон ташқарисида эса хотиржамликни хуш кўраман. Ҳозирги кунда инглиз ва итальян тилларини ўрганиш билан бандман.

“Луганo” мухлисларидан жамоамизни доим қўллаб-қувватлашларини сўраб қоламан. Биз эса чиройли ўйинларимиз билан уларни хурсанд қилишга ҳаракат қиламиз. Олға, “Лугано”!, - деди ўзбекистонлик футболчи.

2027 йилда туғилган Беҳруз Каримов Термизнинг “Сурхон” клубидан трансфер қилинди. Швейцария жамоаси ўзбек футболчиси билан 2031 йилнинг 30 июнига қадар давом этадиган шартнома имзолади.

Беҳруз Каримов Европадаги фаолиятини катта муваффақият билан бошлади