Чемпионлар лигасида Раҳмоналиевнинг жамоаси, Ҳусановнинг эса ўзи “экзотик”, деб топилди
- 11-сентябр, 00:01
- Zohir Toshxo’jayev
- 0
- Футбол
Футбол бўйича УЕФА Чемпионлар лигасининг бошланган умумий босқичи нафақат Европанинг энг кучли клубларини, балки дунёнинг турли бурчакларидан келган футболчиларни ҳам бирлаштирди. Янги мавсум иштирокчилари орасида Бокунинг “Сабах” клуби алоҳида ажралиб туради. Унинг таркибида қитъанинг асосий клублар турнирида камдан-кам учрайдиган бир қатор мамлакат ва ҳудудлар вакиллари бор.
Маълумотларда келтирилишича, 2026/2027 йилги мавсум Чемпионлар лигасининг барча 36 иштирокчиси расмий қайдномалари таҳлили натижасида “Саба”нинг етти футболчиси турнир учун “экзотик” ҳисобланган футбол ассоциацияларига алоқадор экани маълум бўлди.
Бу ерда шартли равишда “экзотик”, деганда УЕФА таркибига кирмайдиган, ҳозирги Чемпионлар лигасида кўпи билан икки футболчи билан намойиш этилган ҳамда етакчи Европа чемпионатларида кўплаб футболчилари иштирок этадиган анъанавий машҳур футбол давлатларига кирмайдиган мамлакат ва ҳудудлар назарда тутилмоқда.
Бу борада гап Стив Солвет (Гваделупа), Эйден Маккарти (Жанубий Африка Республикаси), Умарали Раҳмоналиев (Ўзбекистон), Кахим Перрис (Ямайка), Жой-Ланс Миккелс (Руанда), Ксандер Северина (Кюрасао) ва Орфе Мбина (Габон) ҳақида кетмоқда. Масалан, ҳозирги Чемпионлар лигасида Ўзбекистоннинг иккинчи вакили – Абдукқодир Ҳусанов “Манчестер Сити”да ўйнаяпти.
Бунда футболчининг келиб чиқиш географияси ҳар доим ҳам унинг фуқаролиги билан бир хил эмас. Масалан, Миккелс Германия фуқаролигига эга, аммо келиб чиқиши Руандага бориб тақалади. Шунинг учун таҳлилда футболчи паспорти эмас, балки унинг жўғрофий мансублиги ҳисобга олинди.
Танланган мезон бўйича “Сабах”га энг яқин клубларда уч нафардан шундай футболчи бор. Афинанинг АЕК жамоаси таркибида Гондурас вакили Кервин Арриага, Мавритания футболчиси Абубакари Койта ва англолалик Зини ўйнайди.
“Лилль”да Парагвайдан келган Орландо Гилл, Индонезия терма жамоаси шарафини ҳимоя қиладиган Кальвин Вердонк ва Конго Демократик Республикаси вакили Нгалайель Мукау бор.
Донецкнинг “Шахтёр” клуби таркибида Тунис, Венесуэла ва Буркина-Фасо вакиллари – Алаа Грам, Глейкер Мендоса ва Лассина Траоре тўп тепяпти.
ЛАСК, “Галатасарой”, “Слован” ва “Викинг” клубларида бундай “экзотик” футболчилардан иккитадан бор. Австрия клубида Ливия билан боғланган Даниэль Элфадли ва Суринам вакили Мелайро Богарде ўйнайди. “Галатасарой”да Гвинея-Бисау вакили Ренату Ньяга ва габонлик Марио Лемина бор.
Норвегиянинг “Викинг” клуби эса икки нафар янги зеландиялик – Жо Белл ва Жанни Стенснессга эга.
“Слован” алоҳида эътиборга лойиқ. Агар мезон кўпи билан уч нафар футболчи билан намойиш этилган ассоциацияларгача кенгайтирилса, Братислава клуби футболчилар сони бўйича “Сабах” билан тенглашади. Унинг қайдномасида Панама ва Гамбиянинг иккитадан вакили, шунингдек, Гвинея, Ангола ва Гана футболчилари бор.
Чемпионлар лигаси учун ғайриодатий бўлган география вакиллари Европанинг гранд клубларида ҳам бор. “Манчестер Сити” сафида ўзбекистонлик Абдуқодир Ҳусанов, Дортмунднинг “Боруссия”сида гвинеялик Серу Гирасси, “Барселона”да мисрлик Ҳамза Абдулкарим ўйнайди. ПСВда Кюрасао вакили Армандо Обиспо бор, “Порту” ва “Бетис” клубларида эса Доминикан Республикаси билан боғлиқ футболчилар мавжуд.