"Челси"нинг собиқ ҳимоячиси "Севилья" билан келишувга эришди

Испаниялик ҳимоячи Сесар Аспиликуэта янги клуб борасида якуний қарорга келди.

"El Chiringuito"нинг хабар беришича, 36 ёшли футболчи "Севилья" билан оғзаки келишувга эришган. Шартнома бир мавсумга мўлжалланган бўлиб, яна бир йилга узайтириш имконияти мавжуд.

Ёзда "Атлетико" билан хайрлашгач, Аспиликуэта эркин агент мақомини олди ва фаолиятини давом эттириш учун турли вариантларни кўриб чиқди. Аспиликуэта учун бу профессионал фаолиятидаги учинчи испан клуби бўлади.

"Осасуна" тарбияланувчиси 2010 йилда Францияга йўл олган ва у ерда "Марсель" шарафини ҳимоя қилган. Унинг фаолиятининг энг муваффақиятли даври "Челси"да кечди, у ерда ўн йилдан ортиқ ўйнаб, жамоа сардорига айланди.