“Челси” уч трансфер орқали чемпионликка эришмоқчи

Sports Mole нашри қишки трансфер ойнасида “Челси”ни чемпионлик учун тўлақонли даъвогарга айлантириши мумкин бўлган уч нафар футболчини жамоага қўшишни таклиф қилди.

“Челси”нинг асосий заиф нуқтаси ҳимоя бўлиб қолмоқда, чунки жамоа АПЛнинг дастлабки беш турида 12 та гол ўтказиб юборди. Бу муаммони “Ноттингем Форест”нинг 24 ёшли марказий ҳимоячиси Мурильо ҳал қилиши мумкин. Бразилиялик футболчи уч марказий ҳимоячи билан ўйнайдиган схемага жуда мос келади ва унинг трансфер қиймати тахминан 70 миллион фунтга баҳоланмоқда.

Ярим ҳимояни кучайтириш учун “Монако” футболчиси Ламин Камарани жамоага олиб келиш таклиф қилинмоқда. Сенегал терма жамоаси ярим ҳимоячисининг трансфери ёзда амалга ошмай қолган эди. Бироқ уни 60 миллион фунтга сотиб олиш Рис Жеймс ва Мойсес Кайседолар жароҳат олган пайтда таркибни айлантириш билан боғлиқ муаммоларни ҳал қилиши мумкин.

Ҳужум чизиғини кучайтириш учун эса лондонликларга “Кристал Пэлас”нинг барваста  ҳужумчиси Жан-Филипп Матетани харид қилиш тавсия этилмоқда. Бўйи 193 сантиметр бўлган Франция терма жамоаси футболчиси Виктор Бонифасега ўхшаш ҳужумда кучли таянч нуқтасига айланиши ва зарурат туғилганда Жоау Педрони алмаштириши мумкин.