“Челси” ўтишни икки афсона билан маслаҳатлашдим

“Челси” клубининг янги дарвозабони Эмилиано Мартинес клубга трансферидан олдин жамоа афсоналари Жон Терри ва Петр Чех билан маслаҳатлашганини тан олди.

Лондонликлар тажрибали дарвозабонни “Астон Вилла”дан 7,5 миллион фунт стерлинг эвазига сотиб олганини тасдиқлаган эди. Трансфердан бир неча соат ўтиб, аргентиналик дарвозабон “Челси” сафида дебют қилди ва “Брайтон” устидан 4:3 ҳисобидаги ғалабада иштирок этди.

“Челси”даги биринчи ўйинидан кейин Мартинес клуб афсоналари билан мулоқоти ҳақида гапирди. Шунингдек, у «кўклар» билан Премьер-лига чемпионлигини қўлга киритиш мақсадини маълум қилди.

- Мен “Челси” афсоналари Жон Терри ва Петр Чех билан гаплашдим. Бу қанчалик катта клуб эканини ва бу мавсумда нималарга эришишни хоҳлаётганимизни биламан. Мен бу ерга ёрдам бериш учун келдим.

“Астон Вилла”да ўтказган етти йилим ажойиб бўлди. Мен бу ерга Премьер-лигада ғалаба учун курашиб кўриш мақсадида келдим.

Мен жамоа билан атиги бир кун машғулот ўтказдим. Йигитлар сўнгги бир-икки кун ичида менга жуда яхши муносабатда бўлишди.

Ҳужум чизиғимизда қандай катта истеъдод борлигини биламан. Мен эса ўз навбатимда орқа томонда ишончлиликни таъминлашга ҳаракат қиламан. Бу ўйин идеал бўлмаганини биламан.

Аммо якунда биз ғалаба қозондик ва энди олдинга ҳаракат қилишимиз керак. Олдимизда яна 36 та учрашув бор ва ҳафтадан ҳафтага ҳаракат қиламиз.

Нега бу ерга келганимнинг сабаби бор. Бизда ҳужумда ажойиб учлик бор. Олдинга ҳаракат қилганимизда рақибларга зарар етказишимиз мумкин.

Ўйинни ҳал қилиб қўйиш учун бизда кўплаб имкониятлар бўлди. Коул Палмер ва Жоау Педрода ҳам ўйинни якунлаш учун вазиятлар бўлди. Ҳимояда эса ўтказиб юборилаётган голлар сонини камайтиришимиз керак, - деди Эмилиано Мартинес.