"Cadet and Junior Asian Cup Tashkent 2026" турнири. 71 та медаль юртимизда қолди

Тўрт кун давомида Олимпия шаҳарчасидаги Яккакурашлар аренаси дзюдо бўйича Учқун Муродов хотирасига бағишланган ўсмирлар ва ёшлар ўртасидаги Осиё очиқ Кубогига мезбонлик қилди. 

"Cadet and Junior Asian Cup Tashkent 2026" мусобақасида дунёнинг 10 дан ортиқ давлатидан келган 1500 нафарга яқин истеъдод эгалари икки ёш тоифасида ташкил этилган муросасиз беллашувларда ўз маҳоратларини намойиш қилди. 

Қувонарлиси, ҳам кадетлар, ҳам ёшлар ўртасидаги мусобақада Ўзбекистон терма жамоалари мутлақ устунлик билан ғолибликни қўлга киритди. Аурелиан Чиприан-Флис бош мураббийлигидаги кадетларимиз 13 та олтин, 9 та кумуш, 16 та бронза, Искандар Расулов бошчилигидаги ёшларимиз эса 9 та олтин, 9 та кумуш, 15 та бронза медалига эга чиқишди. Икки терма жамоамиз умумий ҳисобда 71 та медални Ўзбекистонда олиб қолишди. Бу ҳақда Ўзбекистон дзюдо федерацияси матбуот хизмати хабар бермоқда.