Бугун клублар ўртасидаги жаҳон чемпионатига старт берилади

Бугун 22-декабрга қадар давом этадиган клублар ўртасидаги жаҳон чемпионати бошланади. Қуйида ушбу турнир ҳақида баъзи бир маълумотларни билиб олишингиз мумкин. 

Турнир формати ҳақида

ФИФА томонидан ташкил қилинадиган клублар ўртасидаги жаҳон чемпионатида ҳар бир минтақа чемпионлари ва мезбон жамоа иштирок этади, яъни ОЧЛ, КАФ Чемпионлар Лигаси, КОНКАКАФ, Копа Либертадорес, ОФК Чемпионлар Лигаси ва Европа Чемпионлар Лигаси ғолиблари ўртасида турнир ташкил қилинади. Дастлабки ўйин "Ал-Иттиҳод" ва "Окланд Сити" ўртасида бўлиб ўтади. Мазкур учрашувда ғалаба қозонган клуб чорак финалга йўл олади. 1/4 босқичда эса "Леон" - "Урава Редс" ва "Ал-Аҳли" (Миср) - "Ал-Иттиҳод"/ "Окланд Сити" тўқнашувлари бўлиб ўтади. Қолган иккита жамоа, яъни "Флуминенсе" ва "Манчестер Сити" чемпионатни ярим финалдан бошлайди. Демак, "Флуминенсе" - "Ал-Аҳли"/"Ал-Иттиҳод"/ "Окланд Сити", "шаҳарликлар" эса "Леон"/ "Урава Редс" клубларидан бирига қарши майдонга тушади. 

Айрим статистикалар

Клублар ўртасидаги жаҳон чемпионатида энг кўп "Реал" чемпион бўлган (5 марта). Кейинги ўринларда эса "Барселона" (3 марта), "Бавария" ва "Коринтианс" (2 мартадан) туришади. Қолган клублар бир мартадан мундиалда зафар қучган. 

Клублар ўртасидаги жаҳон чемпионатини энг кўп Тони Кросс қўлга киритган. У 6 маротаба ушбу совринни боши узра баланд кўтарган. 

Мундиалда энг кўп голни Криштиану Роналду урган. Ҳужумчи 7 марта дарвозани ишғол қилишга муваффақ бўлган.

Жаҳон чемпионатида энг кўп ўйинни "Ал-Аҳли" вингери Ҳусайн Эл-Шаҳат ўтказган. У 22 марта мазкур турнирда майдонга тушишга улгурди. Маълумот учун, футболчи айни пайтда ҳам Миср клубида тўп тепади ва рекордни ўзи янгилаб қўйиши мумкин. 

Мукофотлар

Турнир давомида жамоаларнинг ўрнидан ташқари, футболчилар учун ҳам шахсий совринлар мавжуд. Аммо бошқа чемпионатларга қараганда номинациялар камроқ.

* Учрашувнинг энг яхши футболчиси

* Турнирнинг энг яхши футболчи (ОАВнинг овоз бериш йўли билан аниқланади)

* Фейр плэй соврини   

Пул мукофотлари

7-ўрин - 0,5 миллион доллар

6-ўрин - 1 миллион доллар

5-ўрин - 1,5 миллион доллар

4-ўрин - 2 миллион доллар

3-ўрин - 2,5 миллион доллар

2-ўрин - 4 миллион доллар

1-ўрин - 5 миллион доллар.

Ўйинларни қаерда томоша қилиш мумкин?

Аввалроқ, МТРК клублар ўртасидаги жаҳон чемпионати трансляциясини сотиб олганини маълум қилганди. Агарда қандайдир муаммолар туғиладиган бўлса, ўйинларни ФИФА+ орқали томоша қилишингиз мумкин бўлади. Ҳа, бу яқиндагина 17 ёшлилар ўртасидаги мундиал баҳсларини намойиш қилган платформа.