Бугун 11 нафар боксчимиз финал йўлланмасига эга чиқди

Хабарингиз бор, айни кунларда Олимпия шаҳарчасида Осиё чемпионати бўлиб ўтяпти. Бугун ҳам кичик ўсмирлар ўртасидаги ярим финал баҳслари давом этди.

- 33 кг даги вакилимиз Шамшод Комилов қозоғистонлик Саят Рахимбердига қарши рингга кўтарилди. Муросасиз жангда Комилов афсуски 0:5 ҳисобида имкониятни бой бериб қўйди ва мусобақани бронза билан якунлади!

- 37 кг: Фаёзбек Норалиев ҳам ярим финал баҳсида рингга кўтарилди. Унга ҳам қозоғистонлик Султангали Нурмахан рақиблик қилди. Жанг жуда қизиқарли тус олди ва якунда Норалиев 5:0 ҳисобида зафар қучди ва финалга йўл олди!

-40 кг: Жасурбек Ҳайруллаев ҳам ярим финал босқичида рингга кўтарилди. Унга Ҳиндистон вакили Нитин рақиблик қилди. Қийин кечган жангда Ҳайруллаев ҳарактер кўрсата олди ва 3:2 ҳисобида зафар қучиб, финалга йўл олди.

-43 кг: Адизбек Илҳомбеков иштирокидаги ярим финал баҳси якунланди. Унга бу босқичда ҳиндистонлик Самир Бохра рақиблик қилди. Вакилимиз имкон қадар ҳаракат қилди. Бироқ якунда 1:4 ҳисобида имкониятни бой бериб қўйди ва бронза медали билан мусобақани якунлади. 

-46 кг: Мансур Абдуҳамитов ҳам ярим финал жангини ўтказди. Унга бу босқичда ҳиндистонлик Меитеи Оина дуч келди. Жанг жуда шиддатли кечди ва Абдуҳамитов 3:2 ҳисобида зафар қучиб, финалга йўл олди.

-49 кг: Сардор Омонбоев ва ҳиндистон Паршант қарама-қаршилиги ўз ниҳоясига етди. Тўлиқ 3 раунд давом этган жангда Омонбоев рақибини бир бор нокдаун ҳолатига тушириб, якунда 5:0 ҳисобида ғалаба қозонди. Бизда яна бир финалчи!

-52 кг: Жавоҳир Неъматжонов ярим финал жангида Саудия Арабистони вакили Рияд Алмусиҳга қарши баҳс юритди. Рақибидан бир бош устун эканлигидан кўрсатган вакилимиз 5:0 ҳисоби билан ғалаба қозонди ва финалга йўл олди.

-55 кг: Бобурмирзо Муродов ярим финал баҳсида жанубий кореялик Жихоо Лее билан баҳс юритди. Ҳар жабҳада устунликка эришган вакилимиз 5:0 ҳисобида зафар қучди. Бизда яна бир финалчи!

-61 кг: Азизбек Эгамберганов иштирокидаги ярим финал жанги ҳам якунланди. Унга бу босқичда Қирғизистон вакили Данияр Абдилатипов рақиблик қилди. Қизиқарли ўтган жангда вакилимиз 4:1 ҳисобида ғалабага эришди ва финалга йўл олди!

-64 кг: Самандар Жўрабоев ҳам ярим финал жангини ўтказди. У қозоғистонлик Динмуҳаммад Молдахан билан финалга йўл олиш масаласини ҳал қилиб олди. Қизиқарли жанг, муросасиз тўқнашув, якуний натижа 4:1 Жўрабоев фойдасига!

-58 кг вазн тоифасидаги вакилимиз Абдуллоҳ Каримжоновнинг ярим финалдаги рақиби тожикистонлик Муҳаммаджон Сулаймонов жароҳат сабабли жанга чиқа олмаган ва Каримжонов тўғридан- тўғри финалга йўл олган. 

-67 кг: Бобур Ниязов ярим финал баҳсида қозоғистонлик Жанай Аманжан билан тўқнаш келди. Ҳар иккиси ўзларининг ажойиб ҳаракатлари билан мухлислар олқишига сазовор бўлишди. Якуний натижа эса қозоғистонлик Аманжан фойдасига 4:1 кўриниш олди. Бизда навбатдаги бронза!

-70 кг: Ўлмасбек Сатимов ярим финалда жанубий кореялик Беомегун Сеога қарши рингга кўтарилди. Вакилимиз қийин жангда 3:2 ҳисобида ғалаба қозонди. Бизда яна бир финалчи! 

+70 кг: Иброҳим Мирзакаримов ярим финал баҳсида ҳиндистонлик Сушант Жаянига қарши рингга кўтарилди. Кучли зарбага эга бўлган вакилимиз жангни кўтаринки кайфиятда бошлади ва биринчи раунддаёқ муддатидан аввал техник нокаут билан ғалабани қўлга киритиб, финалга йўл олди.

Бу ҳақда Ўзбекистон бокс федерацияси хабар бермоқда.