Бу ишни ўзбек футболчилари зўр эплайди
- 7-май 2025, 07:19
- Zohir Toshxo’jayev
- 0
- Футбол
Ўзбекистонлик футбол ишқибозлари бу йил Қозоғистон Премьер-лигасида “Турон” жамоасига мухлислик қилмоқда. Чунки туркистонликлар таркибида тўрт нафар ўзбек легионери тўп тепмоқда.
“Турон” бу йил ўз сафига Шаҳбоз Умаров, Беҳруз Асқаров, Хуршид Мухторов ва Одилжон Абдумажитов сингари ўзбекистонлик чарт тўп усталарини қўшиб олди. Уларнинг бари асосий таркиб ўйинчилари ҳисобланади.
Шаҳбоз Умаров, Беҳруз Асқаров ва Хуршид Мухторов чемпионат ўйинларида рақиблар дарвозасини ишғол қилиб, жорий мавсумдаги голлари ҳисобини очиб олди.
Қозоғистон чемпионатида Ўзбекистон жамоаларида ўйнаб, тажриба оширган футболчилар ҳам бор. Хусусан, “Турон”даги легионерларимиз билан елкама-елка тўп тепаётган Абинур Нуримбет ўтган йили “Андижон” таркибида маҳоратини сайқаллади.
Қозоғистоннинг энг ёрқин истеъдодларидан бири сифатида эътироф этилаётган Абинур Ўзбекистон кубоги соҳиби ҳисобланади. Нуримбет журналистлари билан суҳбатда ҳар икки мамлакат футболини солиштириб ўтди.
Sports.uz портали ушбу суҳбатни ўзбекистонлик ишқибозлар эътиборига ҳавола этади.
— Абинур, сен 19 ёшдасан, лекин учта мамлакат чемпионатида ўйнаш тажрибасига эга бўлдинг. Беларусь чемпионатининг ўзига хос хусусиятни нималардан иборат? Дастлаб, кўзга нималар ташланди.
— Юқори лига даражасидаги илк тажрибани айнан Беларусда тўплаш имконига эга бўлдим. Маҳаллий мураббийларнинг катталар футболига ўтишимда мени ҳар томонлама қўллаб-қувватлагани ва ишонч билдиргани кўзга ташланди.
— Ўзбекистонда ҳам ўйнаб келдинг. Ўзбек чемпионатида техника юқори, лекин қозоқ футболи билан солиштирганда жисмоний кураш сустроқ, деган тушунча бор. Шу тўғрими?
— Ҳа, Ўзбекистонда аксарият футболчилар ажойиб техникага эга, улар ўз техник қобилиятларини юқори тезликда ҳам кўрсата олади. Қозоғистон чемпионати билан солиштиришим қийинроқ, чунки мавсум энди бошланди.
— Бу йил учун қандай шахсий мақсадларни қўйдинг?
— Ёшлар терма жамоасида ўйнаш ва кейинроқ Қозоғистон миллий терма жамоасидан жой олиш. Клублар миқёсида “Турон” жорий мавсумнинг сенсациясига айланишини истайман.
Абинур Нуримбет “Тараз” клуби тарбияланувчиси ҳисобланади. Қуйи лигада “Улитау” жамоасида ижарада ўйнаган. 2023-2024 йиллар давомида Беларусь чемпионатида “Энергетик-БГУ” ҳамда “Гомель” жамоаларида фаолият юритди.
Ўтган йилнинг 16 июлида “Андижон” билан шартнома имзолаб, ярим мавсум Ўзбекистонда тўп тепди. 2025 йилнинг 27 февраль куни эркин агент мақомида “Турон” сафига қўшилди.
Абинур Нуримбетнинг майдондаги асосий амплуаси ҳужумкор ярим ҳимоячи бўлса-да, зарур пайтлар чап қанот ва марказий ҳужумчи позицияда ҳам ўйнай олади.
Ҳусанов жамоаси қарорини ўзгартириши кутиляпти
Шомуродов Римни оёққа турғазди!
Шомуродов “Рома”нинг “топ-5”даги тарихий рекордини таъминлаб берди!