Бу Ҳусанов ҳам, Шомуродов ҳам эмас! ESPN мундиалда қайси ўзбек футболчиси порлашини аниқ айтди
- 16-май, 00:00
- Zohir Toshxo’jayev
- 0
- Футбол
Ўзбекистон миллий терма жамоаси 2026 йилги жаҳон чемпионатига тайергарлик кўраётган бир пайтда нуфузли манбалар ўзбек футболчилари ҳақида турли маълумотларни эълон қила бошлади.
Sports.uz портали машҳур манбалардан espn.com.co сайтида Аббосбек Файзуллаев ҳақида эълон қилинган таҳлилий мақолани ўзбекистонлик футбол ишқибозлари эътиборига ҳавола этади.
- Жаҳон футболи ҳануз анъанавий грандлар атрофида айланаётган бир пайтда, Марказий Осиёда мутлақо янги манзара шаклланмоқда. Футболнинг асосий марказларидан анча узоқда жойлашган Ўзбекистон Аббосбек Файзуллаев тимсолида мамлакат футболчилари ҳақидаги халқаро тасаввурни тубдан ўзгартирган иқтидорни кашф қилди.
Бутун бошли ҳимоя чизиғини ёриб ўта оладиган техникага эга ўзбекистонлик 22 ёшли ҳужумкор футболчи бугун янги авлод рамзига айланди. Бу авлод рақобат қилиш учун эмас, балки мавжуд тартибни ўзгартириш учун майдонга чиқмоқда.
Аббосбек Файзуллаев Сирдарёда туғилган ва болалигидан жаҳон футболининг техник маҳорати юқори юлдузларига, айниқса Лионель Мессига ҳавас қилиб улғайган. Жисмоний куч ва қаттиқ тактик услуб билан машҳур бўлган минтақа учун унинг пайдо бўлиши ҳақиқий инқилоб бўлди.
Бўйи баланд бўлмаса-да, тезкор, креатив ва икки оёқда ҳам бирдек ўйнай оладиган футболчи Тошкентнинг “Пахтакор” клуби академиясида жуда эрта ажралиб тура бошлади. Бу клуб Ўзбекистоннинг энг муҳим футболи марказларидан бири ҳисобланади.
Асосий миллий жамоада мустаҳкам ўрин эгаллашидан олдин ҳам Файзуллаев Ўзбекистоннинг келажакдаги энг катта футболи истеъдоди сифатида тилга олинаётганди. Ёшлар жамоалари сафида у қитъа мусобақалари ва U-20 жаҳон чемпионатида қатнашиб, ўз салоҳиятини намоён қилди.
Ёшлар терма жамоасида у 17 та учрашувда майдонга тушиб, 5 та гол урди ва 3 та голли узатма амалга оширди. Аммо рақамлардан ҳам муҳимроғи – Ўзбекистонда Осиёнинг футболи ривожланган исталган давлати билан техник жиҳатдан тенг кураша оладиган футболчи етиштиргани ҳақидаги ишонч пайдо бўла бошлади.
Унинг профессионал даражадаги ўсиши жуда тез кечди. “Пахтакор”даёқ Аббос ўзига хос иқтидорини кўрсата бошлаган эди, аммо ҳақиқий портлаш 2023 йили, Москванинг ЦСКА клуби уни ўз сафига қўшиб олганидан кейин юз берди.
Кўпчилик Россия футболи жисмоний куч ва юқори прессингга асослангани учун Файзуллаевга қийин бўлади, деб ўйлаган. Аммо аксинча бўлиб чиқди. Ўзбекистонлик футболчи Россия Премьер-лигасини Осиёнинг энг истиқболли ҳужумкор ўйинчиларидан бири сифатида ўзини намоён қилиш майдонига айлантирди.
Рақамлар ҳам унинг ўйини қолдираётган таассуротни тасдиқлай бошлади. Клублар миқёсида у ҳозиргача 137 та ўйинда қатнашиб, 21 та гол урди ва 31 та голли узатма берди.
Айниқса, унинг ЦСКАдаги даври эсда қоларли – у ерда 72 та ўйинда 8 та гол ва 22 та ассист қайд этди. Статистикадан ташқари, европалик мураббийлар ва скаутларни унинг ҳужум пайтида ўйин суръатини бошқариш қобилияти ҳайратда қолдирди. Файзуллаев майдонда вақт секинлашгандек ҳаракат қилади.
Унинг юксалиши Ўзбекистон футболи тарихидаги энг катта ўзгаришлар билан бир вақтга тўғри келди. Ўнлаб йиллар давомида Ўзбекистон Осиё футбол харитасида иккинчи даражали мамлакат сифатида қабул қилинган – рақобатбардош, аммо элита сафига қўшилиш учун ҳал қилувчи қадамни ташлай олмайдиган жамоа бўлган эди.
Бу стереотип Абдуқодир Файзуллаев, Абдуқодир Ҳусанов ва жаҳон чемпионатини орзу эмас, ҳақиқат деб билган бошқа ёш истеъдодлар пайдо бўлиши билан парчалана бошлади.
Ёшлар футболида намоён бўлган иқтидор энди асосий миллий жамоада ҳам порлади. 2026 йилги Жаҳон чемпионати саралаш баҳсларида Файзуллаев янги Ўзбекистоннинг юзига айланди.
У саралаш босқичида 16 та учрашувда иштирок этиб, 4 та гол урди ва 2 та голли узатма берди. Энг ёрқин ўйинлардан бири Эронга қарши баҳс бўлиб, унда Файзуллаев дубль қайд этди ва жамоасини тарихий ғалабага жуда яқинлаштирди.
Якунда Ўзбекистон тарихий натижага эришди – мамлакат илк бор футбол бўйича жаҳон чемпионати йўлланмасини қўлга киритди.
Бу муваффақият футболчининг мақомини бутунлай ўзгартирди. Файзуллаев оддий иқтидорли ўйинчидан миллий қаҳрамонга айланди.
Ўзбекистонда уни бугун “олтин авлод”нинг техник етакчиси ва Марказий Осиё сўнгги ўн йилликларда етиштирган энг муҳим футболчилардан бири сифатида кўришмоқда.
Бежизга у 2023 йилда Осиёнинг энг яхши ёш футболчиси, деб тан олинмаган. Кейинчалик у Ўзбекистоннинг энг яхши футболчиси совринини ҳам қўлга киритди.
Файзуллаевнинг ўйин услуби табиий равишда таққослашларга сабаб бўлмоқда. Россияда уни ҳатто “ўзбек Мессиси”, деб аташди. Бу фақат бўй-басти ёки ҳимоячиларни осонлик билан алдаб ўтиши учун эмас, балки тор ҳудудларда тезлашиш, ҳимоя чизиғини ёриб ўтиш ва деярли имконсиз туюлган пасларни амалга ошириш қобилияти учун ҳам айтилмоқда.
Бу лақаб ортиқча бўлиб туюлиши мумкин, аммо у муҳим бир ҳақиқатни англатади: Файзуллаев географик жиҳатдан бундай футболчи етишиб чиқиши қийин, деб ҳисобланган ҳудуддан чиққан ноёб иқтидордир.
Энди унинг Туркиянинг “Башакшеҳир” клубига ўтиши билан кейинги қадам деярли аниқдек кўринмоқда. Туркия кўпинча Европанинг топ-чемпионатларига йўл очувчи кўприк вазифасини бажаради ва кўпчилик унинг бу трансферини янада каттароқ сакраш олдидан оралиқ босқич, деб баҳоламоқда.
2026 йилги жаҳон чемпионати эса Файзуллаев учун халқаро миқёсдаги энг катта саҳнага айланади. Аммо вазифа осон бўлмайди.
Ўзбекистон “К” гуруҳида Португалия, Колумбия ва Конго Демократик Республикаси билан куч синашади. Бу жамоалар катта тарих ва халқаро тажрибага эга.
Бу турнир Аббосбек Файзуллаев учун рамзий жиҳатдан ҳам жуда муҳим бўлади. У болалигида ҳавас қилган жаҳон юлдузлари – Португалия сафидаги Криштиану Роналду ва Колумбия етакчиси Хамес Родригесга қарши майдонга тушиш имконига эга.
Агар у шундай кучли рақобат муҳитида ўзини кўрсата олса, унинг Европа элитасидаги янада йирик клубга ўтиши эҳтимоли жуда юқори.
Аммо энг муҳими – унинг голлари ёки ассистлари эмас. Ҳатто Ўзбекистоннинг тарихий жаҳон чемпионати йўлланмаси ҳам эмас.
Энг катта воқеа шуки, Аббосбек Файзуллаев дунёга Ўзбекистонга бошқача қарашни ўргатди. Бугун у янги Ипак йўлини қурди ва бу йўл орқали Марказий Осиё энди шунчаки сенсациялар эмас, балки исталган рақиб билан тенг рақобат қила оладиган футболчиларни етказиб бермоқда, - деб ёзди espn.com.co сайти эксперти Луис Нова.