Бу футболчи бунча турмайди! "Арсенал" ва "Сити" Англия терма жамоаси ўйинчиси учун 67 миллион евро тўлашдан бош тортди

"Ньюкасл" ҳозирча ўнг қанот ҳимоячиси Тино Ливраментони сотишга шошилмаяпти. 23 ёшли футболчига бўлган қизиқиш сақланиб қолган: унинг хизматларига ҳам "Арсенал", ҳам "Манчестер Сити" даъво қилмоқда. 

Аммо TEAMtalk хабарига кўра, ҳар икки клуб ҳам "қарғалар" белгилаган камида 58 миллион фунт стерлинг (67 миллион евро атрофида) миқдоридаги талабни қондиришга тайёр эмас.

Маълумотларга кўра, "Арсенал" ва "Манчестер Сити" Ливраментонинг салоҳияти ва Англия терма жамоаси аъзоси сифатидаги имкониятларини юқори баҳолайди. Шу билан бирга, футболчининг жароҳатларга мойиллиги клубларда жиддий хавотир уйғотган. Шу сабабли ҳар икки жамоа ҳозир трансфер бозорида бошқа номзодларни кўриб чиқмоқда.

Ўтган мавсумда Тино Ливраменто "Ньюкасл" таркибида 26 та ўйин ўтказди ва бир голли узатма муаллифига айланди. "Челси" тарбияланувчисининг Transfermarkt порталидаги тахминий бозор қиймати 45 миллион евро этиб кўрсатилган.