"Бу биз омадсиз эканлигимизни англатмайди, ҳаммаси Худонинг режаси" - Хебай "Насаф"дан кетиши, "Андижон"дан кейин ёрқин кўринмаётгани ва "Сўғдиёна"ни танлаши ҳақида

Албаниялик тажрибали ҳужумчи Рубин Хебай “Насаф”даги фаолияти кўнгилдагидек чиқмаганидан кейин иккинчи давра учун жамоасини ўзгартирганини яхши биласиз. Энди у Жиззахнинг “Сўғдиёна” клуби шарафини ҳимоя қилади.

Кўрамиз, футболчининг Жиззахдаги фаолияти қандай кўриниш оларкин? Sports.uz журналисти эса Хебай билан боғланди.

- Рубин, нима учун “Насаф”даги фаолиятингиз кўнгилдагидек чиқмади?

- Шуни айта оламанки, бу омадли бўлмади. Чунки мавсумолди тайёргарликни якунладим ва чемпионат бошида ўзимни яхши ҳис қила бошладим. Лекин расмий ўйиндан 3 кун олдин жароҳат олдим ва тузалишим учун бир ойдан кўп вақт керак эди. Ўйлайманки, бу мен учун ортга қадам бўлди.

- Сизнингча, фаолиятингизни “Насаф”да давом эттиришингиз хато эмасмиди?

- “Насаф”да ўйнаш ҳеч қачон хато эмас. Улар катта клуб ва ўтган йили чемпион бўлишган. Шунингдек, бу йил ҳам “Насаф” биринчи ўринда. Шуни айтишим мумкинки, улар Ўзбекистондаги энг зўр жамоалардан бири.

- Нима сабабдан “Сўғдиёна”ни танладингиз?

- Мураббий мавсумнинг биринчи ярми якунланишидан олдин мен билан боғланди ва у менга ҳаммасини тушунтириб берди. Ҳозир Бошкович билан ишлаётганимдан ўзимни жуда яхши ҳис қиламан. Унинг футбол ўйнаш бўйича ўз ғоялари бор. Менимча, бу ердаги энг яхши мураббийлардан бири. Президент ва директор ҳам менга яхши таклиф беришди ва 1,5 йилга шартнома тузишди. Шу боис у ерга бориб, жамоага ёрдам беришга қарор қилдим.

- Ҳар қандай ҳолатда ҳам юртимиздаги мухлислар сизни “Андижон”даги ёрқин фаолиятингиз орқали яхши эслашади. Бироқ “Андижон”дан кетганингиздан бери омадингиз чопмаяпти. Бу фикрга қўшиласизми?

- Мен унчалик қўшилмайман. Профессионал ўйинчиман ва қаерга борсам ҳам қўлимдан келганини қилишга ҳаракат қиламан. Баъзан биз футболчилар, оддий инсонлар каби паст-баландликларга дуч келамиз. Аммо бу биз омадсиз эканлигимизни англатмайди. Бу Аллоҳнинг режаси. Олдинроқ айтганимдек, мен жароҳат олиб, ортга чекинишга мажбур бўлдим. Ҳозир эса олдингидан кўра кучлироқ ва яхшироқ бўлиб қайтишга ҳаракат қиламан.

- “Насаф”да қайси жиҳатларда мослашишда қийналдингиз?

- Мослашиш мен учун унчалик қийин бўлмади. Черан ва Чолович каби Болқон ўйинчилари билан ўйнадим. Голбан билан ҳам жуда кўп вақт ўтказдим ва маҳаллий ўйинчилар ҳам мени майдоннинг ичида ҳамда майдон ташқарисида ўзимни яхши ҳис қилишимга ёрдам беришди. Улар мени ўз уйимдагидек ҳис қилдиришди. Аммо айтишим мумкинки, жароҳатимдан кейин мураббий менга кўпроқ ўйин вақтини бермади ва мен кўп нарсани кўрсата олмадим. Футболда баъзан ўз вақтингизни кутишингиз керак бўлади. Баъзида инсонлар сизга ишонишади, баъзилари эса йўқ.

- Аввалдан “Сўғдиёна” бош мураббийи Иван Бошкович билан яхши муносабатда бўлганмисиз? У сизни қандай кўндирди?

- Ҳа, биз олдин баъзан учрашгандик. Бироқ бу ўйинчи ва рақиб жамоа мураббийи ўртасидаги профессионал муносабат эди. Ҳозир эса ҳар куни у билан шуғулланиб, суҳбатлашиб, унинг мураббий сифатидаги ҳислатини кўрдим ва мен унга “Сўғдиёна”ни ўз ўрнига қайтаришга ҳар тарафлама ёрдам беришни жуда хоҳлайман. Худо хоҳласа, жамоага бу йил ҳам Кубокни ютишда ёрдам бермоқчиман. Албатта, бу шу мавсумдаги мақсадларимиздан бири ва кейинги йилдаги чемпионатга кучлироқ бўлиб қайтишдир.